اسلام آباد ۔ 25 اکتوبر (اے پی پی) وزیرِ اعظم عمران خان سے چیئرمین ایف بی آر شبر زیدی اور چیئرمین نادرا عثمان یوسف مبین نے جمعہ کو یہاں ملاقات کی۔ ملاقات میں ملک میں ٹیکس نیٹ میں اضافہ کے حوالہ سے اقدامات پر غور کیا گیا۔ اس موقع پروزیرِاعظم نے کہا کہ عوام الناس کو بہتر سہولیات کی فراہمی کے سلسلہ میں حکومتی استعداد کار بڑھانے کیلئے ضروری ہے کہ ٹیکس نیٹ میں اضافہ کیا جائے، ٹیکس نیٹ میں اضافہ سے جہاں موجودہ ٹیکس دہندگان پر اضافی ٹیکسوں کا بوجھ کم ہوگا وہاں حکومت کی جانب سے ملک کے دور دراز علاقوں میں تعلیم، صحت اور دیگر شہری سہولیات کی فراہمی کو یقینی بنایا جا سکے گا۔ انہوں نے کہا کہ ٹیکس کی ادائیگی ایک قومی فریضہ ہے تاہم اس کیلئے ٹیکس دہندگان کا اعتماد بحال کرنا نہایت اہمیت کا حامل ہے۔ انہوں نے کہا کہ حکومت کی یہ کوشش ہے کہ ٹیکس کے نظام کو شفاف بنایا جائے تاکہ ہر محب وطن شہری ملکی تعمیر و ترقی میں اپنا کردار ادا کرے۔
