کراچی۔ 24 مئی (اے پی پی)وزیرِ اعظم عمران خان کی زیر صدارت سندھ میں نیا پاکستان ہاﺅسنگ منصوبے کے اجراءسے متعلق گورنر ہاﺅس کراچی میں اجلاس منعقد ہوا، اجلاس میں گورنر سندھ عمران اسمعیل، وفاقی وزراءعلی زیدی، فیصل واوڈا، مشیر تجارت عبدالرزاق داﺅد، معاون خصوصی نعیم الحق، عقیل کریم ڈھیڈی، ضیغم محمود رضوی، عارف حبیب، نجیب ہارون، آفتاب صدیقی، فردوس شمیم نقوی، ثمر علی خان، صالح احمد فاروقی نے شرکت کی۔ اجلاس میں سندھ کے بڑے شہروں میں کم آمدنی والے افراد کے لئے نیا پاکستان ہاﺅسنگ پروگرام کے تحت مختلف منصوبے شروع کرنے پر غور کیا گیا۔ وزیراعظم نے اس موقع پر اظہار خیال کرتے ہوئے کہا کہ نیا پاکستان ہاﺅسنگ پروگرام حکومت کے اہم ترین اور کلیدی منصوبوں کا حصہ ہے جس کا مقصد کم آمدنی والے افراد کے اپنے ذاتی رہائشگاہ کے خواب کوحقیقت کا روپ دینا ہے۔ ہاﺅسنگ کے شعبے میں مختلف منصوبوں کے آغاز سے سندھ کے لوگوں خصوصا نوجوانوں کو کاروبار اورروزگار کے مواقع میسر آئیں گے اور متعدد متعلقہ صنعتوں کو فروغ اور معیشت کا پہیہ چلے گا۔ وزیرِ اعظم نے کہا کہ نیا پاکستان ہاﺅسنگ پروگرام میں نجی شعبے کی دلچسپی نہایت حوصلہ افزا ہے۔ حکومت چاہتی ہے کہ نجی شعبہ اس ضمن میں پارٹنر بنے۔ اس موقع پر پرائیویٹ سیکٹر کی طرف سے نیا پاکستان ہاﺅسنگ پروگرام کو مزید موثر بنانے کے لیے تجاویز پیش کی گئیں۔
