لاہور۔29مارچ (اے پی پی):وزیرِ اعظم محمد شہباز شریف کی کاٹلنگ میں فتنہ الخوارج کے خلاف کامیاب کاروائی، عید پر شرپسندی پھیلانے کے ناپاک عزائم کو خاک میں ملانے اور قلات میں دہشتگردوں کے خلاف کامیاب کارروائی پر سیکیورٹی فورسز کے افسران و جوانوں کی پزیرائی کی او کہا کہ فتنہ الخوارج سمیت کسی بھی قسم کی دہشتگردی کی تنظیم کو ملک کا امن تباہ کرنے کی اجازت نہیں دیں گے۔
وزیر اعظم آفس کے پریس ونگ کے مطابق وزیرِ اعظم نے مردان میں فتنہ الخوارج اور انکے سہولت کاروں کی بڑی تعداد اور قلات میں کارروائی میں 6 دہشتگردوں کو جہنم رسید کرنے پر سیکیورٹی فورسز کے افسران و اہلکاروں کی پیشہ ورانہ مہارت کی تعریف کی اور کہا کہ افواج پاکستان نے فتنہ الخوارج کے ٹھکانوں کو تباہ کرکے ملک کو بڑے نقصان سے بچایا ہے۔
وزیرِاعظم نے کہا کہ فتنہ الخوارج سمیت کسی بھی قسم کی دہشتگردی کی تنظیم کو ملک کا امن تباہ کرنے کی اجازت نہیں دیں گے، دہشتگردی کی عفریت کے ملک سے مکمل خاتمے تک اس کے خلاف جنگ جاری رکھیں گے۔ وزیر اعظم نے کہا کہ وطن عزیز کی دہشتگردوں کے ناپاک عزائم سے حفاظت کے افواج پاکستان کے غیر متزلزل عزم میں پوری قوم اپنے بہادر جوانوں کے شانہ بشانہ کھڑی ہے۔
Short Link: https://urdu.app.com.pk/urdu/?p=577325
