اسلام آباد ۔ 25 جنوری (اے پی پی) نیشنل ٹرانسمیشن اینڈ ڈسپیچ کمپنی (این ٹی ڈی سی)، سنٹرل پاور پرچیزنگ ایجنسی (سی پی پی اے) اور توانائی سے متعلقہ تمام وفاقی اداروں میں صوبائی نمائندگی یقینی بنانے کا فیصلہ کیا گیا ہے جبکہ ملکی ترقی اور شرح نمو کو مد نظر رکھتے ہوئے آئندہ 25 برسوںکے لئے توانائیکی طلب و رسد کا تیار کردہ تخمینہ جلد وزیرِ اعظم کو پیش کر دیا جائے گا۔ یہ فیصلہ جمعہ کو وزیر اعظم عمران خان کی زیر صدارت خیبر پختونخواہ سے متعلقہ توانائی سے متعلق مختلف ایشوز کے حوالے سے اہم اجلاس میں کیا گیا۔ جس میں وزیر خزانہ اسد عمر، وزیر برائے پٹرولیم غلام سرور خان، وزیر برائے توانائی عمر ایوب خان ، وزیر اعلی خیبر پختونخواہ محمود خان، چیئرمین ٹاسک فورس برائے انرجی ندیم بابر، مشیر وزیر اعلی خیبر پختونخواہ حمایت اللہ اور سینئر افسران نے شرکت کی۔ اجلاس میں صوبہ خیبر پختونخواہ میں تیل اور گیس کی پیداوار، بجلی بنانے کے مختلف منصوبوں پر پیش رفت اور توانائی سے متعلقہ مختلف ایشوز پر بات چیت ہوئی۔ صوبوں کے درمیان نیٹ ہائیڈل منافع جات اور اے جی این قاضی فارمولے سے متعلقہ معاملات کے حل کے لئے کمیٹی کے قیام کا فیصلہ بھی کیا گیا۔ کمیٹی آئندہ ایک ہفتے میں مستقبل کے لائحہ عمل کے لئے سفارشات پیش کرے گی۔ صوبہ پختونخواہ میں پیدا ہونے والی بجلی کی دیگر صوبوں اور ملک کے دیگر حصوں میں فروخت کے لئے ویلنگ کی سہولت فراہم کرنے میں معاونت کرنے کا بھی فیصلہ کیا گیا جبکہ صوبائی حکومت کی جانب سے مقامی طور پر پیدا ہونے والی گیس کی چوری کی روک تھام کے لئے ایک ماہ میں لائحہ عمل پیش کیا جائے گا۔ اجلاس میں فیصلہ کیا گیا کہ تیل اور گیس کی پیداوار سے حاصل ہونے والی آمدنی سے ان علاقوں کوکہ جن سے یہ پیداوار حاصل ہوئی ہے مناسب حصہ دینے کو یقینی بنایا جائے گا۔ وزیرِ توانائی کی جانب سے پیسکو ریجن میں بجلی کے ترسیلی نظام کی تنظیم نو کرنے اور اسے جدید ٹیکنالوجی سے آراستہ کرنے کے لئے کیے جانے والے اقدامات پر بریفنگ دی گئی۔ اجلاس میں پیسکو کے بورڈ کی تنظیم نو کرنے کا بھی فیصلہ ہوا۔ وزیرِ اعظم کو مائیکرو ہائیڈل پراجیکٹ کی تکمیل اور اس سلسلے میں پیش رفت پر بھی بریفنگ دی گئی۔ وزیراعظم کو بتایا گیا کہ آئندہ تین ماہ میں مکمل طور پر تیار 356مائیکرو ہائیڈل پراجیکٹ کمیونٹی کے حوالے کر دیے جائیں گے۔ انرجی پراجیکٹس کے قیام کے لئے پبلک پرائیویٹ پارٹنر شپ کے قانون کو حتمی شکل دی جا رہی ہے۔ اجلاس کے دوران چیئرمین انرجی ٹاسک فورس ندیم بابر کی جانب سے ملکی سطح پر توانائی کی صورتحال کے حوالے سے بھی بریفنگ دی گئی۔ ملکی ترقی اور شرح نمو کو مد نظر رکھتے ہوئے آئندہ پچیس سالوں کے لئے انرجی کی طلب و رسد کا تخمینہ تیار کیا جا چکا ہے جو جلد وزیرِ اعظم کو پیش کر دیا جائے گا۔ وزیراعظم کو بتایا گیا کہ آئندہ دس سالوں میں انرجی کے تمام پراجیکٹ قابل تجدید توانائی پر مبنی ہوں گے۔
