اسلام آباد ۔ 04 جولائی (اے پی پی) وزیر اعظم عمران خان کی منظوری سے پاکستان تحریک انصاف کی21 رکنی کور کمیٹی کے قیام کا باضابطہ نوٹیفکیشن جاری کردیاگیاہے، نوٹیفکیشن مرکزی سیکرٹری جنرل ارشد داد کی جانب سے جاری کیا گیا۔ جمعرات کو پاکستان تحریک انصاف کے مرکزی میڈیا ڈیپارٹمنٹ سے جاری بیان کے مطابق کورکمیٹی کا قیام تحریک انصاف کے آئین کی شق (1.1)VI کے تحت عمل میں آیا ۔کمیٹی کے ارکان میںعبدالعلیم خان، ارشدداد، اسدعمر، بابر اعوان، فواد چودھری، غلام سرور خان، محمود خان، مخدوم شاہ محمود قریشی، محمد عاطف خان، محمد میاں سومرو، مراد سعید، نعیم الحق، پرویز خٹک، قاسم خان سوری، سیف اللہ خان نیازی، سردار عثمان بزدار، سردار یار محمد رند، شفقت محمود، شیریں مزاری، سید علی حیدر زیدی اور سید شبلی فراز شامل ہیں۔ وزیراعظم و چیئرمین پاکستان تحریک انصاف عمران خان کور کمیٹی کی سربراہی کریں گے۔ مرکزی سیکرٹری جنرل ارشد داد کور کمیٹی کے سیکرٹری کے فرائض سرانجام دیں گے ۔ کور کمیٹی کے اجلاس میںاہم قومی، سیاسی و تنظیمی معاملات پر غور و خوض اور پالیسی سازی سے متعلق فیصلے کئے جائیں گے ۔
