اسلام آباد ۔ 8 جنوری (اے پی پی) وزیر خارجہ شاہ محمود قریشی نے کہا ہے کہ افغانستان میں قیام امن نہ صرف افغان عوام کیلئے بلکہ پورے خطہ کیلئے امن و استحکام کا ضامن ہے، پاکستان افغانستان میں قیام امن کیلئے ہمیشہ اپنا بھرپور کردار ادا کرتا رہے گا۔ یہ بات انہوں نے افغان صدر صدر اشرف غنی کے خصوصی نمائندے برائے افغان مفاہمتی عمل عمر داودزئی سے بات چیت کرتے ہوئے کہی جنہوں نے منگل کو یہاں وزارت خارجہ میں ان سے ملاقات کی۔ دفتر خارجہ کے ترجمان کے مطابق ملاقات میں افغان مفاہمتی عمل سمیت اہم علاقائی اور عالمی امور پر تبادلہ خیال کیا گیا۔ عمر داؤد زئی نے اس موقع پر کہا کہ افغانستان کے دیرینہ اور سنگین مسئلہ کو بات چیت کے ذریعے حل کرنے کا وقت آگیا ہے۔ وزیر خارجہ شاہ محمود قریشی نے کہا کہ پاکستان نے پوری تندہی کے ساتھ، مسئلہ افغانستان کے سیاسی، دیرپا اور پر امن حل کیلئے اپنا بھرپور ادا کیا ہے اور انہی کاوشوں کی بدولت آج دنیا ہمارے مؤقف کی تائید کر رہی ہے۔ انہوں نے افغان نمائندے کو افغانستان میں قیام امن کیلئے پاکستان کی کاوشوں اور اس ضمن میں کئے گئے اپنے حالیہ دوروں کی تفصیلات سے آگاہ کیا اور کہا کہ افغانستان میں قیام امن نہ صرف افغان عوام کیلئے بلکہ پورے خطہ کیلئے امن و استحکام کا ضامن ہے۔ پاکستان افغانستان میں قیام امن کیلئے ہمیشہ اپنا بھرپور کردار ادا کرتا رہے گا۔ نمائندہ خصوصی داؤدزء نے خطہ میں استحکام اور افغان مفاہمتی عمل کیلئے پاکستان کی بھرپور کاوشوں کو سراہا۔
