اسلام آباد ۔ 4 مارچ (اے پی پی) وزیر خارجہ مخدوم شاہ محمود قریشی نے کہا ہے کہ دنیا پر واضح ہو چکا ہے کہ پاکستان خطہ میں امن کا داعی ہے۔ وہ پیر کو وزارت خارجہ میں اہم مشاورتی اجلاس کی صدارت کر رہے تھے۔ اجلاس میں سیکرٹری خارجہ تہمینہ جنجوعہ، سابق سیکرٹریز خارجہ، سفراءو وزارت خارجہ کے اعلیٰ حکام نے شرکت کی۔ دوران اجلاس پاک۔بھارت کشیدگی سمیت اہم سفارتی امور پر تبادلہ خیال کیا گیا۔ اس موقع پر وزیر خارجہ نے کہا کہ دنیا پر واضح ہو چکا ہے کہ پاکستان خطہ میں امن کا داعی ہے، ہم مقبوضہ جموں و کشمیر میں جاری بھارتی مظالم کے خلاف او آئی سی کی قرارداد کا خیرمقدم کرتے ہیں۔ اجلاس کے شرکاءنے بہترین سفارتکاری پر وزیر خارجہ کو مبارکباد پیش کی۔ اجلاس میں بہترین حکمت عملی کےلئے مشاورتی اجلاسوں کا سلسلہ تواتر سے جاری رکھنے پر اتفاق کیا گیا۔
