اسلام آباد،نیویارک ۔22ستمبر (اے پی پی):وزیر خارجہ مخدوم شاہ محمود قریشی نے کہا ہے کہ پاکستان اور ناروے کے درمیان، تجارت، سرمایہ کاری اور تعمیر و ترقی کے شعبوں میں تعاون مثالی نوعیت کا ہے۔یہ بات انہوں نے اقوام متحدہ کی جنرل اسمبلی کے 76ویں اجلاس کے موقع پر ناروے کی اپنی ہم منصب اینا ایریکسن سوریڈا سے ملاقات کے دوران کہی۔
ترجمان دفتر خارجہ کے مطابق ملاقات کے دوران دو طرفہ تعلقات ، علاقائی اور عالمی اہمیت کے امور پر تبادلہ خیال کیا گیا۔وزیر خارجہ نے کہا کہ پاکستان اور ناروے کے تعلقات تاریخی نوعیت کے ہیں۔ناروے میں قیام پذیر پچاس ہزار پاکستانیوں کا ، دو طرفہ تعلقات کو مستحکم بنانے میں کلیدی کردار ہے۔انہوں نے کہا کہ دونوں ممالک کے مابین سیاسی، اقتصادی، توانائی اور باہمی دلچسپی کے شعبوں میں دو طرفہ تعاون کو وسعت دینے کے وسیع مواقع موجود ہیں۔
حکومت پاکستان، بیرونی سرمایہ کاروں کو پر کشش مراعات دے رہی ہے۔ناروے کی بڑی کمپنیاں، ہماری کاروبار دوست پالیسیوں سے فائدہ اٹھاتے ہوئے، پاکستان میں سرمایہ کاری کر کے بہترین منافع کما کر سکتی ہیں۔ دونوں وزرائے خارجہ نے پاکستان اور ناروے کے درمیان اگلے سیاسی مشاورتی اجلاس کے جلد انعقاد پر اتفاق کیا۔
وزیر خارجہ نے کہا کہ "ناروے کی پارلیمنٹ میں پاک۔ناروے فرینڈشپ گروپ کا قیام، دونوں ممالک کے مابین پارلیمانی روابط کے فروغ کیلئے سود مند ثابت ہو سکتا ہے۔وزیر خارجہ نے، نارویجین ہم منصب کو افغانستان کی ابھرتی ہوئی صورتحال اور قیام امن کیلئے آئندہ کے لائحہ عمل کے حوالے سے پاکستان کے نقطہ نظر سے آگاہ کیا۔
