اسلام آباد ۔ 05جون (اے پی پی) وزیر خارجہ مخدوم شاہ محمود قریشی کی جلد صحت یابی کیلئے پاکستان سمیت دنیا بھر سے دعائیہ پیغامات کا سلسلہ جاری ہے۔ اتوار کو صدر پاکستان عارف علوی، وزیر اعظم عمران خان، چیرمین سینٹ صادق سنجرانی ،ڈپٹی چیئرمین سینیٹ سلیم مانڈوی والا، سابق آرمی چیف جنرل (ر) راحیل شریف، ریکٹر نسٹ لیفٹیننٹ جنرل (ر) نوید زمان نے بذریعہ ٹیلی فون وزیر خارجہ مخدوم شاہ محمود قریشی کی خیریت دریافت کی اور ان کی جلد صحت یابی کیلئے نیک خواہشات کا اظہار کیا۔ پاکستان مسلم لیگ (ن) کے صدر و قاید حزب اختلاف شہباز شریف، احسن اقبال و دیگر حکومتی و اپوزیشن کے ممبران پارلیمنٹ، اور کثیر تعداد میں اراکین قومی و صوبائی اسمبلی نے بذریعہ فون و میسجز وزیر خارجہ کی خیریت دریافت کی اور نیک خواہشات کا اظہار کیا ہے۔مختلف ممالک کے وزرائے خارجہ کی طرف سے بھی ٹیلیفون کالز اور سماجی رابطے کے ذریعے دعائیہ پیغامات تواتر کے ساتھ موصول ہو رہے ہیں۔ ترک وزیر خارجہ میولوت چاوش اولو، ایران کے وزیر خارجہ جواد ظریف، ڈنمارک کے وزیر خارجہ جیپ کوفورڈ، مالدیپ کے وزیر خارجہ عبداللہ شاہد اور افغانستان کے وزیر خارجہ محمد حنیف آتمر نے وزیر خارجہ مخدوم شاہ محمود قریشی سے انکی خیریت دریافت کی اور جلد صحت یابی کیلئے دعاو¿ں اور نیک تمناو¿ں کا اظہار کیا۔ وزیر خارجہ مخدوم شاہ محمود قریشی کی جلد صحت یابی کیلئے ملک بھر بالخصوص سندھ میں ہزاروں کی تعداد میں اجتماعی دعائیہ تقاریب کا اہتمام کیا گیا ہے۔صوبہ سندھ میں کل 6 جولائی کو ہر ضلع میں دعائیہ تقریب منعقد ہو گی جس میں وزیر خارجہ مخدوم شاہ محمود قریشی کی جلد صحت یابی کیلئے دعائیں کی جائیں گی۔ وزیر خارجہ نے کہا ہے کہ میں، پاکستان اور پاکستان سے باہر ان تمام احباب اور شخصیات کا فرداً فرداً شکر گزار ہوں جنہوں نے بذریعہ کالز، میسجز میری خیریت دریافت کی اور میری صحتیابی کے لئے نیک خواہشات کا اظہار کیا۔میں ان تمام شخصیات کا بھی شکرگزار ہوں جو ملک بھر میں میرے لئے اجتماعی دعاو¿ں کا سلسلہ جاری رکھے ہوئے ہیں۔اللہ تعالیٰ پاکستان کو اور یہاں بسنے والے ہر شخص کو اپنی حفظ و امان میں رکھے اور پاکستان سمیت پوری انسانیت کو اس کرونا جیسی وبا سے نجات عطا فرمائے آمین –
