اسلام آباد۔5اکتوبر (اے پی پی):وفاقی وزیرخزانہ ومحصولات سینیٹرمحمداسحاق ڈارنے کہاہے کہ پاکستان کی معیشت کو بڑے چیلنجز کا سامنا ہے اور موجودہ حکومت نے اپنے عملی پالیسی فیصلوں کے ذریعہ معیشت کو درست سمت پر گامزن کردیاہے۔
انہوں نے یہ بات بدھ کویہاں ایشیائی ترقیاتی بینک کے کنٹری ڈائریکٹرینگ یی کی قیادت میں ایشیائی ترقیاتی بینک کے وفد سے ملاقات میں کہی۔ وزیر مملکت ڈاکٹرعائشہ غوث پاشا، بینک کے ڈپٹی ڈائریکٹراسدعلیم، پرنسپل اکانومسٹ کیوشی تانی گوشی، سینئرمنیجمنٹ سپیشلسٹ لیزیازاتورا اوروزارت خزانہ کے سینئرافسران نے شرکت کی۔وزیر خزانہ نے وفد کا خیرمقدم کیا اور پاکستان میں پائیدار ترقی کے فروغ میں بینک کے کردار اور تعاون کو سراہا۔
انہوں نے وفد کو ملک میں حالیہ سیلاب سے ہونے والی تباہی اور پاکستان کی معیشت پر پڑنے والے اثرات سے آگاہ کیا۔ وزیرخزانہ نے کہا کہ پاکستان کی معیشت کو بڑے چیلنجز کا سامنا ہے اورموجودہ حکومت نے اپنے عملی پالیسی فیصلوں سے نہ صرف معاشی زوال کو روکا ہے بلکہ معیشت کو بھی درست سمت پر گامزن کیا ہے۔ وزیر خزانہ نے موجودہ حکومت کی ترجیحات سے بھی وفد کو آگاہ کیا۔
بینک کے کنٹری ڈائریکٹر نے وزیر خزانہ کا عہدہ سنبھالنے پر سینیٹر اسحاق ڈارکو مبارکباد دی اور پاکستان میں تباہ کن سیلاب میں جانی و مالی نقصان پر ہمدردی کا اظہارکیا۔ انہوں نے وزیر خزانہ کو بتایا کہ بینک پاکستان کو 2.3 سے لیکر 2.5 ارب ڈالر کی فلڈ ریلیف سپورٹ فراہم کرے گا جس میں بریس پروگرام کے لیے 1.5 ارب ڈالر شامل ہیں جو اس ماہ کے دوران منظوری کے لیے بورڈ کے سامنے رکھے جائیں گے۔
انہوں نے اجلاس کے شرکاء کو سماجی وغذائی تحفظ اور توانائی کے شعبوں سمیت مختلف شعبوں میں بنک کے جاری اور مستقبل کے منصوبوں کے بارے میں بھی آگاہ کیا۔انہوں نے بتایاکہ کنٹری پارٹنرشپ اسٹریٹجی برائے پاکستان کی حکمت عملی حکومت پاکستان کے وژن کے مطابق ہے۔
وزیر خزانہ نے پاکستان کی مسلسل حمایت پربینک کے وفد کا شکریہ ادا کیا۔وزیرخزانہ نے وفد کوجاری اور مستقبل کے پروگراموں پر تیزی سے عملدرآمد کے لیے حکومت کی طرف سے مکمل تعاون کا یقین دلایا۔
