اسلام آباد۔17اکتوبر (اے پی پی):وزیر مملکت برائے خارجہ امور حنا ربانی کھر نے فرانسیسی سینیٹ کے خارجہ امور، دفاع اور مسلح افواج کے کمیشن کے صدر کرسچن کیمبون اور فرانسیسی قومی اسمبلی کی خارجہ امور کی کمیٹی کے صدر جین لوئس بورلانگس سے ملاقاتیں کیں۔ یہ ملاقاتیں بالترتیب فرانسیسی سینیٹ اور قومی اسمبلی میں ہوئیں۔
ملاقات میں پاکستان فرانس دوطرفہ تعلقات بشمول پارلیمانی تعاون، پاکستان میں سیلاب کی صورتحال کے علاوہ باہمی دلچسپی کے علاقائی اور عالمی امور پر تبادلہ خیال کیا گیا۔ وزیر مملکت نے دونوں صدور کو دونوں ممالک کے درمیان پارلیمانی رابطوں اور تعاون کو مزید مضبوط بنانے کے لیے دورہ پاکستان کی دعوت دی۔
وزیر مملکت نے فرانسیسی دانشوروں کے ایک گروپ، تھنک ٹینکس کے ارکان اور اسکالرز کے ساتھ ایک گول میز کا نفرنس میں بھی شرکت کی ۔ انہوں نے اہم قومی، علاقائی اور عالمی معاملات پر پاکستان کے نقطہ نظر سے شرکاء کو آگاہ کیا۔
Short Link: https://urdu.app.com.pk/urdu/?p=333072
