اسلام آباد ۔ 11 جولائی (اے پی پی) وزیر مملکت برائے نیشنل ہیلتھ سروسز، ریگولیشن اینڈ کوآرڈینیشن سائرہ افضل تارڑ نے کہا ہے کہ حکومت پاکستان خاندانی منصوبہ بندی کے بارے میں لندن میں ہونے والی اعلیٰ سطحی کانفرنس2017ءمیں فیملی پلاننگ 2020ءکےلئے اپنے 5 عزائم کا اعادہ کرے گی اور اس بات کو یقینی بنائے گی کہ اس کے تمام شہریوں کو معیاری فیملی پلاننگ کی معلومات اور سروسز تک رسائی ہو، تا کہ مانع حمل اشیاءکے استعمال کی شرح 50فیصد تک ہو جائے۔ انہوں نے یہ بات منگل کو پرےس کانفرنس سے خطاب کرتے ہوئے کہی۔ انہوں نے کہا کہ سمٹ میں شرکت کرنے والے تمام صوبائی وزیر ان اغراض و مقاصد کے حصول کےلئے اپنے متعلقہ صوبہ کے فیملی پلاننگ کے اہداف کی ذاتی طور پر نگرانی کرنے کا وعدہ بھی کریں گے۔ سائرہ افضل تارڑ نے حکومت پاکستان کے پانچ عزائم کا ذکر کرتے ہوئے کہا کہ عزم نمبر ایک کے تحت مانع حمل استعمال کی شرح 2020ءتک 50 فیصد کی جائے گی جس کےلئے عوام اور صحت کے نجی شعبوں کو خاندانی منصوبہ بندی میں شامل کیا جائے گا اور 2030ءتک پائیدار ترقی کا ہدف 3.7 فیصد پوراکرنے کے لئے خاندانی منصوبہ بندی اور تولیدی صحت کو یکساں کور کیا جائے گا۔
