وزیر مملکت عبدالرحمن کانجو کا پاکستان بیت المال ریجنل دفتر اور پاکستان سویٹ ہوم ملتان کا دورہ

ملتان۔ 02 اکتوبر (اے پی پی):وزیر مملکت برائے توانائی (پاور ڈویژن) عبدالرحمن خان کانجو نے پاکستان بیت المال ریجنل دفتر جنوبی پنجاب ملتان اور پاکستان سویٹ ہوم کا دورہ کیا۔اس موقع پر ڈائریکٹر پاکستان بیت المال جنوبی پنجاب رانا محمد رمضان طاہر نے وزیر مملکت کو ادارے کے جاری فلاحی منصوبوں، عوامی خدمت اور جنوبی پنجاب میں سرگر میوں کے حوالے سے بریفنگ دی۔وزیر مملکت نے پاکستان سویٹ ہوم ملتان میں مقیم بچوں سے ملاقات کی، ان کی خیریت دریافت کی اور مسائل و ضروریات کے بارے میں معلومات حاصل کیں۔

انہوں نے بچوں کو فراہم کی جانے والی رہائشی، تعلیمی، غذائی اور دیگر سہولیات کا بھی جائزہ لیا۔انچارج پاکستان سویٹ ہوم ملتان فرح ملک نے وزیر مملکت کو سویٹ ہوم کے انتظامی امور اور بچوں کو فراہم کی جانے والی سہولیات کے بارے میں بریفنگ دی۔عبدالرحمن خان کانجو نے پاکستان بیت المال کے مینجنگ ڈائریکٹر سینیٹر کیپٹن (ر) شاہین خالد بٹ کی ادارہ جاتی خدمات اور عوامی فلاح کے لیے کاوشوں کو سراہا۔

انہوں نے جنوبی پنجاب میں پاکستان بیت المال کی فلاحی سرگرمیوں اور عوامی خدمت کے دائرہ کار کو بھی سراہا۔وزیر مملکت نے ریجنل ڈائریکٹر رانا محمد رمضان طاہر کی جنوبی پنجاب میں عوامی فلاح کے لیے کاوشوں پر اعتماد کا اظہار کرتے ہوئے کہا کہ پاکستان بیت المال جیسے ادارے مستحق اور ضرورت مند طبقات کی فلاح و بہبود میں اہم کردار ادا کر رہے ہیں۔دورے کے دوران سابق رکن قومی اسمبلی و سابق معاون خصوصی وزیراعظم پاکستان ملک عبدالغفار ڈوگر، سعد خورشید کانجو اور مسلم لیگ (ن) کے رہنما سید بابر شاہ بھی ان کے ہمراہ تھے۔