وفاقی وزارت تعلیم و پیشہ ورانہ تربیت ، فیڈرل بورڈ اور فیڈرل ڈائریکٹوریٹ آف ایجوکیشن کی جانب سے تین روزہ گرلز سپورٹس کارنیوال کا انعقاد

اسلام آباد۔18اکتوبر (اے پی پی):وفاقی وزارت تعلیم و پیشہ ورانہ تربیت ، فیڈرل بورڈ آف انٹرمیڈیٹ اینڈ سیکنڈری ایجوکیشن اسلام آباد اور فیڈرل ڈائریکٹوریٹ آف ایجوکیشن اسلام آباد کی جانب سے تین روزہ گرلز سپورٹس کارنیوال کا انعقاد پاکستان سپورٹس بورڈ میں کر دیا گیا۔

اس کارنیوال کا مقصد ملک بھر کی نوجوان خواتین کھلاڑیوں کی صلاحیتوں اور ٹیلنٹ کو اجاگر کرنا ہے۔ان مقابلوں میں ملک بھر سے چار ہزار خواتین نے مختلف کھیلوں کے مقابلوں میں حصہ لیا جن میں ٹریک اینڈ فیلڈ ایونٹس ، باسکٹ بال ، فٹ بال، والی بال، ٹیبل ٹینس ، بیڈ منٹن اور ٹینس شامل ہیں۔وفاقی سیکرٹری برائے تعلیم محی الدین احمد وانی نے اس کارنیوال کے کردار پر زور دیتے ہوئے کہا کہ ہم کھیلوں کے ذریعے لڑکیوں کو جسمانی سرگرمیوں میں حصہ لینے کے مواقع فراہم کر رہے ہیں۔کارنیوال میں اسلام آباد ، گلگت بلتستان اور آزاد جموں کشمیر سمیت ملک بھر سے خواتین کی ایک بڑی تعداد نے شرکت کی ۔اس موقع پر مہمان خصوصی وفاقی وزیر تعلیم ڈاکٹر خالد مقبول صدیقی نے والی بال میچ کی بال پھینک کر اس تقریب کا افتتاح کیا۔ انہوں نے اپنے خیالات کا اظہار کرتے ہوئے کہا کہ ایسے کارنیوال کے ذریعے نوجوان لڑکیوں کو با اختیار بنانے کے مواقع فراہم ہوتے ہیں اور انہیں کھیلوں کے ذریعے اپنے شوق کی پیروی کرنے کی ترغیب اور سہولت فراہم ہوتی ہے ۔

مہمان خصوصی نے شرکاء کی طاقت ، ثابت قدمی اور عزم کی تعریف کی اور کہا کہ میں کارنیوال کا اہتمام کرنے والے اور اس میں شامل ہونے والے ہر فرد کو کارنیوال کو کامیاب بنانے پر مبارکباد پیش کرتا ہوں ۔گرلز سپورٹس کارنیوال کی افتتاحی تقریب میں حکومتی سطح پر شرکت ہوئی اور اس کارنیوال کو کامیاب بنانے میں اس کا حصہ بنے۔

Short Link: https://urdu.app.com.pk/urdu/?p=514486