لاہور۔9دسمبر (اے پی پی):وفاقی وزیرداخلہ محسن نقوی نے پیرکو یہاں جامعہ اشرافیہ میں وفاق المدارس کے سرپرست اعلی مولانا فضل رحیم اشرفی اور دیگر اکابرین سے ملاقات کی ۔وفاقی وزیرداخلہ محسن نقوی نے اس موقع پر مولانا فضل رحیم اشرفی کی خیریت دریافت کی اور نیک خواہشات کا اظہار کیا ۔وزیرداخلہ نے ملاقات میں دینی مدارس کے بل کے حوالے سے بھی تفصیلی تبادلہ خیال کیا ۔
اس موقع پر مولانا فضل رحیم اشرفی نے گفتگو کرتے ہوئے کہا کہ مدارس کے معاملات پر سیاست نہیں ہونی چاہیے،مدارس کے ایشو پر ہم اپنا مثبت کردار ادا کریں گے۔ انہوں نے کہا کہ پنجاب میں بھی وفاق کی طرز پر مدارس محکمہ تعلیم کے ماتحت ہونے چاہیں۔وفاقی وزیرداخلہ نے مدارس کے حوالے سے مثبت کردار ادا کرنے کی یقین دہانی پر مولانا فضل رحیم کا شکریہ ادا کیا۔مولانا فضل رحیم اشرفی نے ملک کی سلامتی،ترقی اور خوشحالی کے لئے دعا کی۔
