اسلام آباد ۔ 7 جنوری (اے پی پی) وفاقی وزیر برائے تعلیم و پیشہ وارانہ تربیت شفقت محمود نے کہا ہے کہ شرح خواندگی میں اضافہ کیلئے ملک میں بھرپور خواندگی مہم چلائی جائے گی، وفاقی حکومت تعلیمی ایمرجنسی لگانے پر بھی غور کر رہی ہے۔ پیر کو انہوں نے یہ بات ملک میں خواندگی مہم چلانے کے جائزہ اجلاس کی صدارت کرتے ہوئے کہی۔ اس موقع پر وفاقی وزیر کو خواندگی مہم پر تفصیلی بریفنگ دی گئی جبکہ اجلاس میں خواندگی مہم کے مختلف پہلوﺅں کو زیر بحث لایا گیا۔ اجلاس کو بتایا گیا کہ وفاقی وزارت تعلیم جلد ہی ملک بھر میں خواندگی کی مہم شروع کرے گی۔ مہم کا مقصد 4 سالوں میں شرح خواندگی میں خاطر خواہ اضافہ کرنا ہے۔ اس موقع پر وفاقی وزیر شفقت محمود نے کہا کہ ملک بھر میں تعلیمی ایمرجنسی پر غور کررہے ہیں۔ انہوں نے کہا کہ ملک میں شرح خواندگی میں اضافے کے لئے وفاقی حکومت ایک بڑی مہم چلائے گی، ہر ضلع میں تقریباً 5000خواندگی اور ہنرمندی کے مراکز قائم کیے جائیں گے۔ انہوں نے کہا کہ مہم کے لئے تیز ترین پڑھنا لکھنا سیکھنے کے لئے سلیبس متعارف کرائے جائیں گے، قومی سطح پر نیشنل لٹریسی کو آرڈینیشن سینٹر قائم کیاجائے گا۔
