اسلام آباد ۔ 6 جولائی (اے پی پی) وفاقی وزیر برائے قومی غذائی تحفظ و تحقیق سیّد فخر امام نے کہا ہے کہ نامیاتی کپاس کا مستقبل بلوچستان ہے، زراعت کی بنیاد بیج کے نظام پر منحصر ہے۔ ان خیالات کا اظہار انہوں نے پیر کو فیڈرل سیڈ سرٹیفیکیشن اینڈ رجسٹریشن ڈیپارٹمنٹ (ایف ایس سی اور آر ڈی) کے ورکنگ سے متعلق اجلاس کی صدارت کرتے ہوئے کیا۔ ڈی جی ایف ایس سی اینڈ آرڈی افتخار حیدر نے مجموعی ورکنگ کے طریقہ کار سے متعلق بریفننگ دی.سید فخر امام نے مزید کہا کہ متحرک، خالص اور نامیاتی زراعت پوری طرح کام نہیں کر رہی، زراعت کی بنیاد بیج کا نظام ہے۔ انہوں نے ایف ایس سی اور آرڈی کے کام کو سراہا اور کہا کہ یہ محکمہ ملک میں بیج کے بہترین نظام کےلئے کلید ثابت ہوگا۔انہوں نے مزید کہا کہ 70 فیصد بہترین بیج رحیم یار خان میں بنتا ہے۔انہوں نے ایف ایس سی اور آر ڈی سے یہ بھی کہا کہ وہ پاکستانی مصنوعات کو آئی پی او کی مدد سے برانڈ کرائیں۔ فیڈرل سیڈ سرٹیفیکیشن اینڈ رجسٹریشن ڈیپارٹمنٹ وزارت قومی فوڈ سیکیورٹی اینڈ ریسرچ کا منسلک محکمہ ہے پورے ملک میں 27 فیلڈ آفس/ لیبارٹریز ہیں۔ ایف ایس سی اور آر ڈی ایک تیسرا فریق محکمہ ہے جس کے پاس بیج ایکٹ 1976 ، بیج (ترمیمی) ایکٹ 2015 اور اس سے متعلقہ قواعد و ضوابط کی قانونی دفعات کے تحت مختلف فصلوں کے بیجوں کے معیار کو منظم کرنے کا مینڈیٹ ہے۔ یہ قومی بیج کونسل کے ایگزیکٹو بازو کی حیثیت سے بھی کام کرتا ہے۔ایف ایس سی اور آرڈی نے جولائی 2019ءمیں ایس ٹی اے، سوئٹزرلینڈ سے مرکزی بیج ٹیسٹنگ لیب کی بین الاقوامی ایکری حیثیت حاصل کی۔
