اسلام آباد۔19مارچ (اے پی پی):وفاقی وزیر برائے توانائی (پاور ڈویژن) سردار اویس احمد خان لغاری نے توانائی کے شعبے میں اصلاحات کے لیے کام شروع کر دیا ہے اور اس سلسلے میں انہوں نے پاور پلاننگ اینڈ مانیٹرنگ کمپنی (پی پی ایم سی) کی جانب سے منعقدہ بریفنگ کی صدارت کی۔
منگل کو ہونے والی بریفنگ نے توانائی کے شعبے کے اندر ڈسٹری بیوشن کمپنیوں(ڈسکوز) کی کارکردگی کے حوالے سے اہم خدشات کو اجاگر کیا جن کے جواب میں وفاقی وزیر اویس لغاری نے بجلی کی تقسیم کار کمپنیوں کے سینئر ایگزیکٹو مینجمنٹ کا فوری جائزہ لینے کی ہدایت جاری کی اور انسانی وسائل کے کسی بھی خلا کو فوری طور پر دور کرنے کی ضرورت پر زور دیا۔ وفاقی وزیر نے پی پی ایم سی کو ڈسکوز کے بورڈ آف ڈائریکٹرز کا جامع جائزہ لینے کا کام سونپا ہے جس سے قیادت میں ممکنہ تبدیلی کا اشارہ ملتا ہے۔
اس کے علاوہ وفاقی وزیر نے پی پی ایم سی کو پاور سیکٹر میں تکنیکی مداخلت کے لیے تجاویز تیار کرنے کی بھی ہدایت کی ہے جس کا مقصد جدید ٹیکنالوجی کےاستعمال سے پاور سیکٹر کی کارکردگی بہتر کر کے صارفین کو زیادہ سے زیادہ فائدہ پہنچانا ہے۔سردار اویس احمد خان لغاری نے نیشنل ٹرانسمیشن کمپنی کی بریفنگ کے دوران این ٹی ڈی سی کی کاردکردگی کو غیر تسلی بخش قرار دیا اور ہدایت جاری کرتے ہوئے کہا کہ کسی بھی ٹرانسمیشن لائن کے منصوبے میں تاخیر کو کسی صورت برداشت نہیں کیا جائے گا۔
