اسلام آباد۔16نومبر (اے پی پی):وفاقی وزیر خزانہ ومحصولات سینیٹر محمد اسحاق ڈار نے متعلقہ حکام کومیراپاکستان میراگھر پروگرام میں موجود آپریشنل رکاوٹوں کو دور کرنے اور ان کو حل کرنے کے لیے ممکنہ تجاویز پر کام کرنے کی ہدایت کی ہے۔انہوں نے یہ بات بدھ کویہاں میرا پاکستان میرا گھر (ایم پی ایم جی ) سکیم کے بارے میں اجلاس کی صدارت کرتے ہوئے کہی۔اجلاس میں چیئرمین این اے پی ایچ ڈی اے، لیفٹیننٹ جنرل (ر) انور علی حیدر، ڈپٹی گورنر اسٹیٹ بینک سیما کامل ، فنانس ڈویژن اور اسٹیٹ بینک کے دیگر سینئر افسران نے شرکت کی۔
اجلاس کے دوران وزیر خزانہ کو ’میرا پاکستان میرا گھر‘ ہائو سنگ فنانس مارک اپ سبسڈی سکیم، اس کے مالیاتی خدوخال اور اس میں درپیش آپریشنل، فنکشنل رکاوٹوں اور عوام کو ہائوسنگ فنانس کی سہولیات فراہم کرنے میں پیش رفت کے طریقوں کے بارے میں بریفنگ دی گئی۔ اجلاس میں موجودہ میرا پاکستان میرا گھر اسکیم میں کچھ ڈھانچہ جاتی تبدیلیوں پر بھی غور کیا گیا تاکہ اس پروگرام کا عوام تک فائدہ پہنچانے کے لیے اسے مزید اہدافی اور قابل رسائی بنایا جا سکے۔
وزیر خزانہ سینیٹر اسحاق ڈار نے موجودہ حکومت کے اس عزم کا اظہار کیا کہ کم آمدن اور متوسط طبقے کو مناسب قیمتوں پر رہائش کی سہولیات فراہم کی جائیں گی۔ وفاقی وزیر نے متعلقہ حکام کو مزیدہدایت کی کہ وہ موجودہ پروگرام میں موجود آپریشنل رکاوٹوں کو دور کرنے اور ان کو حل کرنے کے لئے ممکنہ تجاویز پر کام کریں اور اسے عوام کے مفاد کے لئے بنائیں۔ انہوں نے اس سلسلے میں تمام شراکت داوںکو موجودہ حکومت کے ہر طرح کے تعاون کا یقین دلایا۔
