وفاقی وزیر داخلہ محسن نقوی کا راولپنڈی میں فائرنگ کے واقعے کا نوٹس ،اسلام آباد پولیس کےاے ایس آئی علی اکبر کی شہادت پر گہرے دکھ کا اظہار

اسلام آباد۔29نومبر (اے پی پی):وفاقی وزیر داخلہ محسن نقوی نے راولپنڈی کے ایک علاقے میں فائرنگ کے واقعے کا نوٹس لیتے ہوئے اسلام آباد پولیس کے اسسٹنٹ سب انسپکٹر (ASI) علی اکبر کی شہادت پر گہرے دکھ کا اظہار کیا ہے۔وزیر داخلہ نے بیان میں شہید افسر کی خدمات اور قربانی کو سراہا اور ان کے اہل خانہ کے ساتھ دلی ہمدردی کا اظہار کیا۔

انہوں نے کہا کہ وہ اس مشکل وقت میں اہل خانہ کے ساتھ کھڑے ہیں۔محسن نقوی نے اسلام آباد پولیس کے انسپکٹر جنرل سے واقعے کی تفصیلی رپورٹ طلب کی اور فائرنگ میں ملوث تمام ملزمان کی فوری گرفتاری کے احکامات جاری کیے۔انہوں نے کہا کہ ہم شہیداے ایس آئی علی اکبر کے اہل خانہ کے غم میں برابر کے شریک ہیں اور یقین دلایا کہ ذمہ دار افراد کو بلا تاخیر قانون کے مطابق سزا دی جائے گی۔