لاہور۔19مارچ (اے پی پی):صوبائی وزیر صنعت و تجارت چوہدری شافع حسین نے کہا ہے کہ ٹیوٹاکے 350اداروں میں سٹیٹ آف دی آرٹ ٹیکنیکل ایجوکیشن فراہم کی جارہی ہے۔ان خیالات کا اظہار انہوں نے بدھ کے روز یہاں مقامی ہوٹل میں پرائم منسٹر یوتھ پروگرام کے حوالے سے منعقدہ تقریب سے خطاب کرتے ہوئے کیا ۔
صوبائی وزیر صنعت نے کہا کہ سکل ڈویلپمنٹ ایک ماہ قبل محکمہ صنعت و تجارت وسرمایہ کاری کا حصہ تھا،ٹیوٹا کو اب وزارت صنعت و تجارت وسرمایہ کاری سے علیحدہ کردیا گیا ہے،ٹیوٹاکے 350اداروں میں ٹیکنیکل ایجوکیشن فراہم کی جارہی ہے۔
چوہدری شافع حسین نے کہاکہ وزیر اعلی پنجاب مریم نواز شریف نے ٹیکنیکل ایجوکیشن کے فروغ کیلئے فنڈز فراہم کئے جن سے ٹیوٹا کے اداروں کی لیبز اور کورسز کو اپ گریڈ کیا گیا اور ٹیوٹا کے اداروں میں 3ماہ کے مفت آئی ٹی کورسز شروع کئے گئے،بچوں کوآرٹیفشل انٹیلی جنس،مشین لرننگ اور دیگر جدید کورسز مفت کروائے گئے،ان کورسز کی انٹرنیشنل سرٹیفیکیشن بھی کرائی جارہی ہے اس کے علاوہ بچوں کو آن لائن تکنیکی تربیت کی فراہمی بھی شروع کی گئی۔
صوبائی وزیر صنعت و تجارت نے کہا کہ بیرون ممالک ہنرمند افرادی قوت کی بہت ڈیمانڈ ہے اور حکومت چاہتی ہے کہ نوجوان لیگل طریقے سے باہر جائیں اور ملک کیلئے قیمتی زرمبادلہ کمائیں۔انہوں نے کہا کہ ٹیوٹا کے اداروں میں سولر سٹڈیز کا آغاز کیا گیا اور انڈسٹری کو سولر انرجی پر منتقل کرنے کا بھی آغاز کیا۔چوہدری شافع حسین نے کہا کہ اگر ہر شعبہ ہائے زندگی سے وابستہ فرد محنت سے کام کرے تو ایک سال میں آئی ایم ایف سے جان چھوٹ سکتی ہے لیکن بدقسمتی سے ہمارا زیادہ وقت اور انرجی ایک دوسرے کی ٹانگیں کھینچنے میں صرف ہو رہا ہے،ہمسایہ ممالک ہم سے ترقی کے لحاظ سے بہت آگے نکل چکے ہیں، ہم سب کو مل کر ملک کی ترقی اور خوشحالی کیلئے کام کرنا ہے۔
صوبائی وزیر نے نے کہا کہ اسلام امن اور سلامتی کا مذہب ہے جس میں دہشت گردی کی کوئی گنجائش نہیں،معصوم لوگوں کی زندگیوں سے کھیلنے والوں کا مذہب سے کوئی تعلق نہیں،پاک فوج اور سکیورٹی کے ادارے بہادری سے دہشت گردوں کا صفایا کر رہے ہیں۔انہوں نے مزید کہا کہ پوری قوم کو دہشتگردوں کے خلاف مل کر جنگ لڑنی ہے اور امن دشمنوں کے عزائم خاک میں ملانے ہیں۔ تقریب کی صدارت چیئرمین پرائم منسٹر یوتھ پروگرام رانا مشہود احمد خان نے کی۔
Short Link: https://urdu.app.com.pk/urdu/?p=574190
