اسلام آباد۔6جون (اے پی پی):سپیکر قومی اسمبلی سردار ایاز صادق نے تمام پارلیمانی جماعتوں کو ہدایت کی ہے کہ وہ قائمہ کمیٹیوں کی تشکیل کیلئے فی الفور اپنی اپنی جماعت کی طرف سے نام قومی اسمبلی سیکرٹریٹ کو جمع کرا دیں بصورت دیگر ان کے پاس جتنے نام آ گئے ہیں وہ اسی بنیاد پر کمیٹیوں کے نوٹیفکیشن جاری کر دیں گے۔
جمعرات کو قومی اسمبلی میں اعجاز الحق کے سوال کے جواب میں وفاقی وزیر قانون اعظم نذیر تارڑ نے کہا کہ باردانے کی تقسیم کے حوالے سے بھی تحقیقات ہو رہی ہیں۔ پارلیمانی کمیٹی حکومت کی نگرانی کا کام کرتی ہے۔ سپیکر قومی غذائی تحفظ کی کمیٹی کی تشکیل کا نوٹیفکیشن جاری کریں تاکہ کمیٹی تحقیقاتی رپورٹ کا جائزہ لیکر سفارشات مرتب کرے۔
میر شبیر بجارانی نے کہا کہ نگران کابینہ نے کس بنیاد پر گندم کی درآمد کی اجازت دی، صرف سیکرٹری کو ہٹانے سے کاشتکار کو کوئی ریلیف نہیں ملے گا۔ کاشتکار کو فوری ریلیف چاہئے۔ سپیکر نے وزیر قانون و انصاف کو ہدایت کی کہ تمام ارکان کی وفاقی وزیر قومی غذائی تحفظ کے ساتھ ملاقات کرائیں۔
