اسلام آباد۔8اپریل (اے پی پی):وزیراعظم محمد شہباز شریف نے کہا ہے کہ پاکستان اور ترکیہ کے درمیان معاشی تعلقات کو وسعت دینے کے کثیر مواقع موجود ہیں،دونوں ممالک کے درمیان سمندر میں تیل اور گیس کی تلاش کے حوالے سے تعاون کے معاہدے سے دوطرفہ اقتصادی تعلقات کو مزید تقویت ملے گی۔منگل کو وزیراعظم آفس کے میڈیا ونگ سے جاری بیان کے مطابق انہوں نے ان خیالات کا اظہار ترکیہ کے وزیر توانائی و قدرتی وسائل الپرسلان بائیرقطار کی قیادت میں 9 رکنی وفد سے گفتگو کرتے ہوئے کیا جس نے وزیراعظم سے یہاں ملاقات کی۔وفد سے گفتگو کرتے ہوئے وزیراعظم نے کہا کہ ہمیں پاکستان اور ترکیہ کے صدیوں پر محیط برادرانہ تعلقات پر فخر ہے،ترکیہ کے صدر رجب طیب اردوان کے حالیہ دورہ پاکستان سے دونوں ممالک کے اقتصادی تعلقات میں مزید بہتری آئے گی۔
وزیراعظم نے ترکیہ کے وزیر توانائی اور اعلیٰ سطحی وفد کا پاکستان منرلز انویسٹمنٹ سمٹ میں شرکت پر شکریہ ادا کیا۔ انہوں نے کہا کہ دونوں ممالک کے معاشی تعلقات کو نئی وسعت دینے کے کثیر مواقع موجود ہیں،ترکیہ اور پاکستان کے درمیان سمندر میں تیل اور گیس کی تلاش کے حوالے سے تعاون کے معاہدے سے دونوں ممالک کے اقتصادی تعلقات کو مزید تقویت ملے گی۔ ملاقات میں توانائی کے شعبے بالخصوص قابل تجدید توانائی میں تعاون بڑھانے پر اتفاق کیا گیا ۔ترکیہ کے وفد نے پاکستان میں توانائی کے شعبے میں جاری اصلاحات کو سراہا ۔ترکیہ کے وزیر توانائی نے کہا کہ توانائی بالخصوص بجلی کے شعبے میں اصلاحات اور نجکاری کے سلسلے میں ترکیہ اپنا کامیاب تجربہ پاکستان کے ساتھ شیئر کرے گا
توانائی کے شعبے میں جاری اصلاحات اس شعبے کو سرمایہ کاری کے لیے مزید پرکشش بنائیں گی۔ ترک وزیر نے پاکستان میں معدنیات کے شعبے بالخصوص نادر معدنیات کی دریافت میں گہری دلچسپی کا اظہار کیا۔ انہوں نے کہا کہ پاکستان منرلز انویسٹمنٹ سمٹ میں شرکت سے پاکستان میں اس شعبے کی وسیع استعداد کا درست اندازہ ہوا۔ ملاقات میں نائب وزیر اعظم و وزیر خارجہ محمد اسحاق ڈار،وفاقی وزیر بجلی اویس لغاری،وفاقی وزیر پٹرولیم علی پرویز ملک، معاون خصوصی طارق فاطمی اور اعلیٰ سرکاری حکام موجود تھے۔
Short Link: https://urdu.app.com.pk/urdu/?p=579670
