اسلام آباد۔10جون (اے پی پی):صدر مملکت ڈاکٹر عارف علوی نے کہا ہے کہ پاکستان جمہوریہ پولینڈ کے ساتھ اپنے تعلقات کو انتہائی قدر کی نگاہ سے دیکھتا ہے ،پاکستان پولینڈ کے ساتھ تجارت، معیشت اور عوامی روابط کے شعبوں میں دوطرفہ تعلقات کو مزید وسعت دینے کا خواہاں ہے ، ان خیالات کا اظہار انہوں نے جمعہ کو پولینڈ میں پاکستان کے نامزد سفیر ڈاکٹر خالد حسین میمن سے ملاقات کے دوران گفتگو کرتے ہوئے کیا۔
انہوں نے کہا کہ مشترکہ بزنس فورم کے قیام ، توانائی کے شعبے میں پولینڈ کی کمپنیوں کے ساتھ تعاون کو مزید مستحکم کیا جاسکتا ہے ،نامزد سفیر پاکستان کے جی ایس پی پلس اسٹیٹس کی تجدید کے لیے پولینڈ کی مسلسل حمایت حاصل کرنے کے لیے کام کریں،انہوں نے کہا کہ پاکستان میں سیاحوں کی آمد بڑھانے کیلئے نامزد سفیر سیاحت کے شعبے میں موجود مواقع اجاگر کریں ، نامزد سفیر پاکستان اور پولینڈ کی جامعات کے مابین ادارہ جاتی روابط کے قیام کے لیے کام کریں ۔
صدر مملکت نے کہا کہ تعلیم کے شعبے میں دوطرفہ تعلقات مزید مستحکم بنانے سے پاکستانی جامعات کا تعلیمی اور تحقیقی معیار بہتر بنانے میں مدد ملے گی،نامزد سفیر پولینڈ میں پاکستانی افرادی قوت کی تعداد بڑھانے پر بھی کام کریں ،صدر مملکت نے نامزد سفیر کو پولینڈ میں پاکستان کے سفیر کے طور پر تقرری پر مبارکباد بھی پیش کی ۔
