پاکستان میں سیلاب متاثرین کیلئے کنگ سلمان ریلیف سینٹر کی طرف سے فوڈ پیکج کا تیسرا امدادی قافلہ روانہ

اسلام آباد۔22اگست (اے پی پی):پاکستان کے سیلاب متاثرین کیلئے کنگ سلمان ریلیف سینٹر کی طرف سے فوڈ پیکج کا تیسرا امدادی قافلہ روانہ کردیا ہے۔ سعودی سفارت خانے کی طرف سے جاری بیان کے مطابق کنگ سلمان ہیومینٹیرین ایڈ اینڈ ریلیف سنٹر نے حالیہ سیلاب سے متاثرہ افراد کی غذائی ضروریات کو پورا کرنے کے لیے ہنگامی امداد سے لدے 950 ٹن ضروری اشیائے خوردونوش کے 100 ٹرک روانہ کردیئے۔ 10 ہزار فوڈ پیکج پاکستان کے تمام صوبوں کے 17 اضلاع میں رہنے والے سیلاب سے متاثرہ افراد میں تقسیم کئے جائیں گے۔

اس فوڈ پیکج میں تمام تر ضروری اشیائے خوردونوش شامل ہیں۔ ایک فوڈ پیکج کا مجموعی وزن 95 کلوگرام ہے جس میں 80 کلو آٹا، 5 لیٹر کوکنگ آئل، 5 کلو چینی، 5 کلو دال چنا شامل ہیں جو نیشنل ڈیزاسٹر مینجمنٹ اتھارٹی اور مقامی حکومت کے تعاون سے سیلاب سے متاثرہ علاقوں میں تقسیم کیے جائیں گے۔ اس غذائی پیکج سے 70 ہزار سے زائد افراد مستفید ہونگے۔

اس موقع پر پاکستان میں سعودی سفیر نواف بن سعید المالکی نے کہا کہ دونوں ممالک کے درمیان گہرے تعلقات ہیں اور سعودی عرب ہمیشہ سے قدرتی آفات سے نمٹنے کیلئے پاکستان کے ساتھ ہے۔ جبکہ چیئرمین این ڈی ایم اے لیفٹیننٹ جنرل اختر نواز نے سعودی سفیر نواف بن سعید المالکی، کنگ سلمان ریلیف سینٹر اور سعودی قیادت کا سیلاب متاثرین اورقدرتی آفات کی امداد پر شکریہ ادا کیا۔

گزشتہ ماہ بھی کنگ سلمان ریلیف سینٹر نے بلوچستان کے مختلف اضلاع میں مقیم سیلاب سے متاثرہ گھرانوں میں 5 ہزار فوڈ پیکجز تقسیم کئے۔ جس سے تقریبا 35 ہزار سے زائد افراد مستفیدہوئے ہیں۔

Short Link: https://urdu.app.com.pk/urdu/?p=323289