پاکستان والی بال ٹیم نے بھارت کو3-0 سے شکست دیکر سیمی فائنل میں جگہ بنا لی

لاہور۔1اکتوبر (اے پی پی):پاکستان والی بال ٹیم نے ایشین گیمز میں شاندار کارکردگی کا سلسلہ جاری رکھتے ہوئے بھارت کو کوارٹر فائنل میں3-0 سے شکست دیکر سیمی فائنل میں جگہ بنا لی۔پاکستان نے کوارٹر فائنل میں بھارت کے خلاف تینوں سیٹس میں عمدہ کھیل پیش کیا اور 25-19،25-23 اور25-18 سے کامیابی حاصل کی۔اس سے قبل قومی ٹیم نے ابتدائی مرحلے میں قازقستان کو3-1 اور ازبکستان کو 3-0 سے شکست دی تھی،جبکہ جاپان کے ہاتھوں اسے0-3 سے شکست کا سامنا کرنا پڑا تھا۔

بھارت کیخلاف کامیابی کے بعد پاکستان ایشین گیمز کے مردوں کے والی بال ایونٹ کی ٹاپ چار ٹیموں میں شامل ہوگیا ہے۔قومی ٹیم اب سیمی فائنل میں ایران کے مدمقابل ہوگی،دونوں ٹیموں کے درمیان اہم مقابلہ جمعہ2 اکتوبر کو جاپانی وقت کے مطابق شام4 بجے جبکہ پاکستانی وقت کے مطابق دوپہر12 بجے اوکازاکی چو سوگو پارک جمنازیم میں کھیلا جائے گا۔

پاکستان والی بال ٹیم سیمی فائنل میں ایران کو شکست دیکر گولڈ میڈل کے فائنل میں جگہ بنانے کے عزم کے ساتھ میدان میں اترے گی۔پاکستان والی بال فیڈریشن نے بھارت کیخلاف شاندار کامیابی اور سیمی فائنل تک رسائی پر قومی ٹیم کے کھلاڑیوں،کوچنگ اسٹاف،ٹیم مینجمنٹ اور آفیشلز کو مبارکباد دی ہے۔

فیڈریشن نے قومی ٹیم کی بھرپور حمایت کرنے والے پاکستانی شائقین اور کھیلوں کے مداحوں کا بھی شکریہ ادا کیا ہے۔قومی ٹیم ایشین گیمز کے آخری چار میں پہنچ چکی ہے اور اب ایران کیخلاف سیمی فائنل میں کامیابی حاصل کرکے گولڈ میڈل میچ تک رسائی کی خواہاں ہے۔