اسلام آباد ۔ 20 جون (اے پی پی) وزیر خارجہ شاہ محمود قریشی نے دنیا بھر میں پناہ گزینوں کے ساتھ اظہار یکجہتی کرتے ہوئے کہا ہے کہ پاکستان کو پناہ گزینوں کے تحفظ کیلئے قانونی تحفظ میں حصے اور اپنے تاریخی کردار پر فخر ہے۔ جمعرات کو پناہ گزینوں کے عالمی دن کے موقع پر اپنے ایک پیغام میں انہوں نے کہا کہ 70ءکی دہائی میں برمی مہاجرین سے …
پاکستان کو پناہ گزینوں کے تحفظ کیلئے قانونی تحفظ میں حصے اور اپنے تاریخی کردار پر فخر ہے،شاہ محمود قریشی
اسلام آباد ۔ 20 جون (اے پی پی) وزیر خارجہ شاہ محمود قریشی نے دنیا بھر میں پناہ گزینوں کے ساتھ اظہار یکجہتی کرتے ہوئے کہا ہے کہ پاکستان کو پناہ گزینوں کے تحفظ کیلئے قانونی تحفظ میں حصے اور اپنے تاریخی کردار پر فخر ہے۔ جمعرات کو پناہ گزینوں کے عالمی دن کے موقع پر اپنے ایک پیغام میں انہوں نے کہا کہ 70ءکی دہائی میں برمی مہاجرین سے لے کر 90ءکے اوائل میں بوسنیائی مہاجرین تک پاکستان نے ہمیشہ تحفظ اور پناہ کے متلاشی مہاجرین کی مذہبی، نسلی اور قومی تفریق کے بغیر دل کھول کر میزبانی کی ہے۔ انہوں نے کہا کہ پاکستان میں موجودہ لاکھوں افغان مہاجرین کے 40 سال مکمل ہو گئے ہیں، پاکستان کے عوام نے اپنے گھر اور دل ان کیلئے کھول دیئے اور پاکستانی عوام نے افغان بہن بھائیوں کیلئے میزبانی کا مثالی مظاہرہ کیا۔ اگرچہ ہمارے وسائل کم تھے لیکن ہم نے ہمیشہ سخاوت اور بھرپور میزبانی کی اقدار کا مظاہرہ کیا۔ رجسٹرڈ افغان مہاجرین کو بینک اکاﺅنٹ کھولنے کی اجازت دے کر حکومت پاکستان نے ان اقدار کی بھرپور عکاسی کی ہے۔ پاکستان یو این ہائی کمشنر برائے مہاجرین کے کام کو سراہتا ہے۔
