اسلام آباد۔3مارچ (اے پی پی):پاکستان نے رمضان المبارک کے مقدس مہینے کے دوران غزہ میں انسانی ہمدردی کی بنیاد پر اہم امداد کو روکنے کے اسرائیلی فیصلے کی سخت ترین الفاظ میں مذمت کرتے ہوئے کہا ہے کہ یہ تازہ ترین کارروائی لاکھوں ضرورتمند فلسطینیوں کو اشد ضروری انسانی امداد سے محروم کرنے کے لئے اسرائیل کی منظم مہم کا حصہ ہے ۔
ترجمان دفتر خارجہ کی جانب سے جاری بیان کے مطابق یہ قابض طاقت کی طرف سے بین الاقوامی قانون کی ایک اور صریح خلاف ورزی ہے اور یہ جنگ بندی کے معاہدے کو خطرے میں ڈال سکتی ہے۔
بیان میں عالمی برادری سے مطالبہ کیا گیا کہ وہ غزہ تک غیر محدود انسانی رسائی کو یقینی بنائے اور لاکھوں شہریوں کو انسانی امداد سے انکار کے ذریعے اجتماعی سزا کے نفاذ پر اسرائیل کا محاسبہ کرے۔بیان میں کہا گیا کہ ہم غزہ میں مستقل جنگ بندی کو یقینی بنانے کے معاہدے کے مکمل نفاذ کے ساتھ ساتھ دو ریاستی حل جس میں 1967 سے پہلے کی سرحدوں پر مبنی ایک قابل عمل، خودمختار فلسطینی ریاست جس کا دارالحکومت القدس الشریف ہو،کے حصول کے لیے سیاسی عمل کی بحالی کے اپنے مطالبے کا اعادہ بھی کرتے ہیں ۔
Short Link: https://urdu.app.com.pk/urdu/?p=568382
