راولپنڈی۔8مئی (اے پی پی):پاکستان کی مسلح افواج کے ترجمان لیفٹیننٹ جنرل احمد شریف چوہدری نے کہا ہے کہ پاکستان کی مسلح افواج نے ایک اور بھارتی جارحیت ناکام بنا دی ہے، پاک فوج نے راولپنڈی ، بہاولپور ،گوجرانوالہ ،اٹک سمیت مختلف مقامات پر12 ڈرونز مار گرائے، لاہور اور سندھ ڈرون حملوں میں ایک شہری شہید، پاک فوج کے 4 جوان زخمی ہوگئے۔ جمعرات کو میڈیا کو بریفنگ دیتے ہوئے ڈی جی آئی ایس پی آر لیفٹیننٹ جنرل احمد شریف چوہدری نے کہا کہ بھارت نے گزشتہ رات ایک بار پھر کھلی جارحیت کرتے ہوئے پاکستانی فضائی حدود کی خلاف ورزی کی ہے، مختلف شہروں میں بھارت کی جانب سے بھیجے گئے تمام12ہیروپ ڈرونز مار گرادیے گئے ہیں۔
لاہور ، گوجرانوالہ، چکوال، راولپنڈی، اٹک، بہاولپور، میانو، چھور اور کراچی کے قریب مار گرائے جانے والے بھارتی ڈرونز کاملبہ ابھی جمع کیا جارہا ہے۔انہوں نے کہاکہ افسوس کہ لاہور میں ایک ڈرون فوجی تنصیب کو نشانہ بنانے میں کامیاب ہوگیا جس کے نتیجے میں پاک فوج کے 4 جوان زخمی ہوگئے جبکہ آلات کو جزوی نقصان پہنچا ہے۔ترجمان پاک فوج نے کہا کہ میانو سندھ میں ڈرون سرگرمی کے نتیجے میں ایک شہری شہید اور ایک زخمی ہوا ہے۔انہوں نے کہاکہ بھارت نے 6 اور 7 مئی کی شب کو پاکستان پر حملہ کرکے خواتین، بچوں اور بوڑھوں سمیت معصوم شہریوں اور مساجد کو نشانہ بنایا اور جواباً اسے جو ہزیمت اٹھانا پڑی، جس میں اس کے 5 طیارے اور متعدد ڈرون مار گرائے گئے، لائن آف کنٹرول پر اسے شدید جانی نقصان اور پوسٹوں کی تباہی کا سامنا کرنا پڑا، اس کے بعد لگتا ہے کہ بھارت عقل کے تمام راستے کھونے کے قریب ہے۔
ترجمان پاک فوج نے کہا کہ بھارت نے رات جو جارحیت کی ہے وہ انتہائی شدید اشتعال انگیزی ہے اور آپ کی افواج نے اسے منہ توڑ جواب دیا ہے، انہوں نے کہا کہ پاکستان میں ہیروپ ڈرونز بھیجنے کا عمل جاری ہے اور افواج پاکستان انہیں ایک ایک کرکے نشانہ بنارہی اور تباہ کررہی ہیں۔لیفٹیننٹ جنرل احمد شریف چوہدری نے کہاکہ اقوام عالم دیکھ رہی ہیں کہ بھارت نہ صرف اس خطے اور پوری دنیا کے امن کو خطرے میں ڈال رہا ہے، ہم ہر قسم کے خطرات اور ہر قسم کی جارحیت سے نہ صرف نمٹنا بخوبی جانتے ہیں، نمٹ رہے ہیں بلکہ جارحیت کرنے والوں کو سبق سکھانے کا نہ صرف عزم رکھتے ہیں بلکہ اس کی پوری صلاحیت رکھتے ہیں۔انہوں نے کہا کہ اس میں کوئی شک نہیں ہے کہ بھارت اس ننگی جارحیت پر مبنی اقدامات کی قیمت ادا کررہا ہے اور ادا کرتا رہے گا۔
Short Link: https://urdu.app.com.pk/urdu/?p=594341
