پاکستان کی معیشت مستحکم ہے،ملک میں سرمایہ کاری اورکاروبارکیلئے سازگارماحول فراہم کیاگیاہے، وزیرخزانہ محمداورنگزیب کاواشنگٹن میں سیمینارسے خطاب

واشنگٹن ڈی سی ۔24اپریل (اے پی پی):وفاقی وزیر خزانہ و محصولات سینیٹر محمد اورنگزیب نے کہاہے کہ پاکستان کی معیشت مستحکم ہے،ملک میں سرمایہ کاری اورکاروبارکیلئے سازگارماحول فراہم کیاگیاہے۔انہوں نے یہ بات جمعرات کوواشنگٹن ڈی سی میں جے پی مورگن کے زیرِ اہتمام ”پاکستان کی معاشی و مالی پالیسی کا منظرنامہ” کے موضوع پرمنعقدہ سمینیارمیں کہی جس میں ادارہ جاتی سرمایہ کاروں کے ساتھ مفید بات چیت کی گئی۔

وزیر خزانہ نے شرکاء کو ملک کی مستحکم معاشی صورتحال سے آگاہ کیا۔انہوں نے کہاکہ حسابات جاریہ کے کھاتوں کاتوازن فاضل رہاہے، تجارتی خسارہ میں کمی ہوئی ہے، کئی سالوں کی کم ترین مہنگائی، مضبوط زرمبادلہ کے ذخائر اور موثر قرضہ جاتی انتظامات سے معیشت کی بہتری کی عکاسی ہورہی ہے انہوں نے بتایا کہ ان مثبت اشاریوں کے نتیجے میں کریڈٹ ریٹنگ کی بین الاقوامی ایجنسی فچ نے پاکستان کی خودمختار کریڈٹ ریٹنگ کو بہتر کیا ہے۔

وزیر خزانہ نے بھارت میں دہشت گرد حملے میں سیاحوں کی جانوں کے ضیاع پر افسوس کا اظہار کیا اور کہا کہ پاکستان دہشت گردی کی ہر شکل اور صورت کی مذمت کرتا ہے۔ سیمینار کے اختتام پر وزیر خزانہ نے سرمایہ کاروں کے سوالات کے جوابات بھی دیئے۔

Short Link: https://urdu.app.com.pk/urdu/?p=587370