اسلام آباد ۔ 4 اگست (اے پی پی) عید کی خوشیاں بانٹنے کے لئے پاک بحریہ کی جانب سے عیدالاضحی کے موقع پر کراچی کے نواحی علاقوں سمیت سندھ کے کریکس اور ساحلی قصبوں کے ضرورت مند اورکورونا وائرس کی وبا سے متاثرہ خاندانوں میں راشن بیگ تقسیم کئے گئے۔ ترجمان پاک بحریہ کے مطابق کوروناوائرس کی وبا پھیلنے کے بعد سے ہی پاک بحریہ معاشرے کے مستحق اور پسماندہ طبقوں تک ضروریات زندگی کا سامان پہنچنانے کے لئے اقدامات کر رہی ہے۔ حالیہ مہم کے دوران کراچی کے نواح میں اربن سٹی گوٹھ، سومر گوٹھ، جمالی گوٹھ، حاجی احمد گوٹھ، ولی محمد گوٹھ، یونس آباد، کاکا گاوں اور بابا/بھٹ جزیروں اور ضلع ٹھٹھہ کے مختلف علاقوں میں ہزاروں خاندانوں کو راشن فراہم کیا گیا جبکہ سندھ کے ضلع ٹھٹھہ کے ساحلی علاقوں سجاول اور بدین میں بھی راشن تقسیم کیا گیا۔ اس کارخیر میں مختلف این جی اوز نے بھی پاک بحریہ کے ساتھ تعاون کیا۔ وبائی مرض کورونا کے چیلنج کے دوران پاک بحریہ قومی جذبہ اور عزم کے ساتھ عوام کی مدد جاری رکھے گی۔
