راولپنڈی۔27اگست (اے پی پی):پاک فضائیہ کے سربراہ ائیر چیف مارشل ظہیر احمد بابر سدھو نے مشترکہ تربیتی اقدامات کے ذریعے پاکستان اور ایتھوپیاکی فضائی افواج کے درمیان فوجی شراکت داری کو بڑھانے کے عزم کا اعادہ کیاہے۔بدھ کوآئی ایس پی آرکی جانب سےجاری بیان کے مطابق پاک فضائیہ کے سربراہ ائیر چیف مارشل ظہیر احمد بابر سدھو سے ایتھوپیا کی فضائیہ کے کمانڈر لیفٹیننٹ جنرل یلما مرداسا نے ائیر ہیڈ کوارٹرز میں ملاقات کی۔ ملاقات کے دوران پیشہ وارانہ دلچسپی کے شعبوں پر تفصیلی بات چیت کی اور دونوں فضائی افواج کے درمیان تعاون کو مضبوط بنانے کے عزم کا اعادہ کیا۔ پاک فضائیہ کے چاق و چوبند دستے نے لیفٹیننٹ جنرل یلما مرداسا کو گارڈ آف آنر پیش کیا۔ملاقات کے دوران پاک فضائیہ کے سربراہ نے مشترکہ تربیتی اقدامات کے ذریعے دونوں فضائی افواج کے درمیان شراکت داری کو بڑھانے کے عزم کا اعادہ کیا۔ انہوں نے معزز مہمان کو ایتھوپیا کی فضائیہ کے پیشہ وارانہ مقاصد میں پی اے ایف کی مستقل حمایت کا یقین دلایااور اس بات کا اعادہ کیا کہ پاکستان ایتھوپیا کے ساتھ اپنے خوشگوار تعلقات کی دل کی گہرائیوں سے قدر کرتا ہے اور صلاحیت کی تعمیر، جدید تربیت اور آپریشنل ڈومینز میں جامع مدد فراہم کرنے کے لئے پرعزم ہے۔
لیفٹیننٹ جنرل یلما مرداسا نے ان کی اور ان کے وفد کی گرمجوشی سے مہمان نوازی پر پاک فضائیہ کے سربراہ کا تہہ دل سے شکریہ ادا کیا۔ ایتھوپیا کی فضائیہ کے کمانڈر نے پی اے ایف کی مضبوط آپریشنل تیاری، اس کی ابھرتی ہوئی کثیر جہتی صلاحیتوں اور اس کی قابل اعتماد ڈیٹرنس پوزیشن کو سراہا۔ انہوں نے اس بات پر روشنی ڈالی کہ ایتھوپیا کی فضائیہ اپنی آپریشنل صلاحیتوں کو مضبوط بنانے کے لئے پی اے ایف کے بھرپور جنگی تجربے، مربوط کمانڈ سسٹمز اور تکنیکی اختراعات سے سبق حاصل کرنے کی منتظر ہے۔ معززمہمان نے ہوا بازی کے شعبے میں ٹیکنالوجی کی منتقلی کے مواقع تلاش کرنے خاص طور پر مقامی ترقی اور جدت پر مبنی اقدامات میں بھی گہری دلچسپی کا اظہار کیا۔ ایتھوپیا کے ایئر چیف کو نیشنل آئی ایس آر اور انٹیگریٹڈ ایئر آپریشنز سینٹر اور پی اے ایف سائبر کمانڈ میں جامع بریفنگ دی گئی جہاں انہوں نے پی اے ایف کی تکنیکی ترقی اور جدید جنگ میں جدید صلاحیتوں کے انضمام کو سراہا۔لیفٹیننٹ جنرل یلما مرداسا کا ایئر ہیڈ کوارٹرز اسلام آباد کا دورہ دونوں ممالک کےدرمیان فوجی شراکت داری کو مضبوط بنانے، تعاون کو فروغ دینے اور مضبوط تعلقات کو فروغ دینے کے عزم کی نشاندہی کرتا ہے۔
