اسلام آباد۔17جولائی (اے پی پی):پاک فوج کی جانب سے سیلابی صورتحال میں ملک بھر میں وسیع پیمانے پر فضائی ریسکیو آپریشنز شروع کئے گئے، سیلاب سے متاثرہ علاقوں میں فوری ردعمل کے تحت متعدد افراد کو محفوظ مقامات پر منتقل کر دیا گیا۔ آرمی ایوی ایشن کے ہیلی کاپٹرز نے دشوار گزار علاقوں میں امدادی سرگرمیاں انجام دیں۔ تفصیلات کے مطابق پاک فوج نے بارشوں اور سیلاب متاثرہ علاقوں میں فوری ردعمل کے تحت چکری راجن میں تین افراد کو ریسکیو کیا۔
چکوال اور خانپور میں فضائی ریسکیو آپریشن کے ذریعے 27 افراد کو ریسکیو کیا گیا۔ چک مونجو کے علاقے میں ریسکیو آپریشن کے دوران 10 افراد کو محفوظ مقامات پر پہنچایا گیا۔ ڈھوک بھدر کے علاقے میں ایک اور کامیاب آپریشن میں 31 متاثرین کو نکالا گیا۔ داراپور میں فضائی ریسکیو مشنز میں 38 شہریوں کو محفوظ مقام پر منتقل کیا گیا۔ متاثرین کو لائیو جیکٹس اور فوری امداد کی فراہمی بھی کی جا رہی ہے۔ آرمی ریسکیو اینڈ ریلیف آپریشن میں مقامی انتظامیہ بھی بھرپور حصہ لے رہی ہے۔
