راولپنڈی ۔ 26 فروری (اے پی پی) پاک فوج کے ترجمان میجر جنرل آصف غفور نے بھارتی جھوٹے دعوﺅں کوایک بار پھر بے نقاب کرتے ہوئے واضح کیا ہے کہ ہمارا جواب مختلف ہوگا،اب بھارت ہماری جوابی کارروائی اور سرپرائزکا انتظار کرے، سیاسی ،عسکری،سفارتی سمیت ہرمحاذ پر جواب دیا جائے گا، جھوٹے دعوﺅں کا جواب سچ سے دیں گے، بھارت کو چیلنج ہے کہ وہ21 منٹ تک پاکستان کی فضائی حدود میں رہ کر دکھائے ۔منگل کو ڈائریکٹر جنرل آئی ایس پی آر میجر جنرل آصف غفور نے میڈیا کو بریفنگ دیتے ہوئے بھارت کے مختلف میڈیا چینلز کی جانب سے شائع کی جانے والی شہ سرخیوں کو بھی دکھایا جس میں یہ دعوی کیا گیا کہ بھارتی جہاز 21منٹ تک آزاد کشمیرمیں رہے ،دوسری طرف یہ کہا گیا کہ پہلی سٹرائیک 3بجکر 45منٹ سے 3بجکر 53منٹ ، دوسری سٹرائیک3بجکر 48منٹ تا 3بجکر 55منٹ اور تیسری سٹرائیک 3بجکر 58منٹ سے 4بجکر 4منٹ پر کی گئی ،بھارت نے پاکستان کو پہلے مختلف دو مقامات پر مشغول کیا لیکن پھر کشمیر میں تیسرے مقام سے دراندازی کی، یہ بھارتی دعوے ہیں، اللہ کی ذات بڑی ہے ، بھارت میں ہمت ہے تو آئے اور پاکستان کی حدود میں 21 منٹ تک رہ کردکھائیں۔انہوں نے کہا کہ پچھلے چند دنوں سے پاکستان اور بھارت کے درمیان حالات میں کشیدگی چل رہی ہے، جس دن سے کشیدگی کا آغاز ہوا جنگ کی تیاری کے طریقہ کار کے مطابق زمینی فورس، فضائی اور بحری فورسز نے اقدامات کیے ہوئے ہیں، لائن آف کنٹرول (ایل او سی) پر ہماری فوج تعینات ہے، جب بھی بھارتی فوج زمینی راستہ اختیار کرتی انہیں وہی جواب ملتا جو ہم نے منصوبہ بنایا تھا۔انہوں نے کہا کہ بیوقوف دوست سے عقل مند دشمن بہتر ہوتا ہے، ہماری بدقسمتی یہ ہے کہ ہمارا ہمسایہ بھارت دشمنی میں بھی بے وقوفی اور جھوٹ کا سہارا لیتا ہے، آئے 21 منٹ تک پاکستان کی فضائی حدود میں رہ کر دکھائیں۔انہوں نے کہا کہ وزیراعظم نے کہا تھا کہ حملہ کیا تو جواب کا سوچیں گے نہیں جواب دیں گے۔ڈی جی آئی ایس پی آر نے کہا کہ 14 فروری کے بعد جب ٹینشن بڑھی توہماری فضائیہ بھی معمول کے ساتھ فضائی پیٹرولنگ کرتی رہیں ، کمبٹ ایئر پیٹرولنگ کے دوران فضا میں رہتے ہیں، 14 فروری کے بعد سے کیپ مشن فضاءمیں ہیں، پیشہ وارانہ کام چلتے رہتے ہیں۔ترجمان پاک فوج نے کہا کہ بھارت کی فارمیشن چار سے پانچ ناٹیکل میل اندر آئی جنہیں پاکستان ایئر فورس نے چیلنج کیا، بھارتی طیاروں نے جاتے ہوئے پے لوڈ ڈراپ کیا ، ان کے چار بم جبہ کے مقام پر گرے۔انہوں نے کہا کہ رات کو بھی ہمارا کمبٹ مشن قریب تھا جب سیالکوٹ میں پہلی بار بھارتی طیارے ریڈار پر آئے، ہماری فورس نے انہیں چیلنج کیا لیکن وہ قریب نہیں آئے اور اپنی حدود میں رہے۔انہوں نے کہاکہ دوسرا بھارتی فارمیشن اوکاڑہ بہاولپور سیکٹر میں ریڈار نے نوٹ کیا گیا، اگر یہ ہماری کسی بھی ملٹری پوزیشن پر اسٹرائیک کرتے تو ایئرفورس کی فائٹ ہوتی، اگر یہ مورچے پر اٹیک کرتے تو فوج اور ایئرفورس تیار ہے، اگرآرمی کی پوسٹ پر اسٹرائیک ہوتی تو یونیفارم اہلکاروں کی شہادت ہوتی لیکن ان کا مقصد سویلین کو نشانہ بنایا تھا تاکہ وہ دعویٰ کرسکیں کہ انہوں نے دہشتگرد کیمپوں پر حملہ کیا۔انہوں نے کہاکہ لائن آف کنٹرول کی طرف آتے ہوئے اور واپس جاتے ہوئے 4 منٹ لگے، اگر ایل او سی پر اسٹرائیک کرتے تو فضائیہ کی فائٹ ہوتی ہے جو نہیں ہوئی۔انہوں نے کہاکہ بھارت نے 350 سے زائد دہشت گردوں کی ہلاکت کا دعویٰ کیا لیکن میں کہتا ہوں کہ کوئی ایک اینٹ بھی نہیں ٹوٹی، اگر وہاں کوئی عمارت ہوتی یا 10 لوگ بھی مرے ہوتے تو وہاں ملبہ ہوتا، لاشیں ہوتی، خون ہوتا لیکن جھوٹ کے کوئی پاو¿ں نہیں ہوتے۔انہوں نے کہا کہ ہم نے پہلے بھی بھارت کے جھوٹ کو بے نقاب کیا اور آئندہ بھی کریں گے اور ہم بھارت کے جھوٹ کا جواب سچ سے دیں گے۔
