پنجاب حکومت ہر مشکل گھڑی، ہر شہر اور ہر تکلیف میں اپنے عوام کے شانہ بشانہ کھڑی ہے، صوبائی وزیر اطلاعات

لاہور۔28اگست (اے پی پی):وزیر اطلاعات و ثقافت پنجاب عظمیٰ بخاری نے کہا ہے کہ پنجاب حکومت ہر مشکل گھڑی، ہر شہر اور ہر تکلیف میں اپنے عوام کے شانہ بشانہ کھڑی ہے، وزیراعلیٰ پنجاب کا وعدہ ہے کہ وہ عوام کے ساتھ ہر سکھ دکھ میں کھڑے رہیں گے اور ان کے مسائل کے حل کے لئے ہر ممکن اقدام کریں گے۔عظمیٰ بخاری نے مزید کہا کہ انتظامیہ، ریسکیو ورکرز، سول ڈیفنس اور پاک فوج کے جوان متاثرہ شہریوں کو ریسکیو کرنے اور ان کی مدد کے لئے دن رات مصروفِ عمل ہیں، محکمہ صحت کا عملہ بھی عوام کو ہر ممکن ریلیف فراہم کرنے کے لئے پوری طرح متحرک ہے۔وزیر اطلاعات پنجاب نے مختلف شہروں میں متاثرہ افراد کو ریسکیو کرنے کی ویڈیوز بھی شیئر کیں اور کہا کہ پنجاب حکومت مشکل وقت میں عوام کو تنہا نہیں چھوڑے گی۔