لاہور۔9جولائی (اے پی پی):لاہور ،گوجرانولہ اور راولپنڈی سمیت پنجاب کے مختلف اضلاع میں شدید بارش،صوبہ بھر کے ڈپٹی کمشنرز کو الرٹ رہنے کی ہدایات جاری کر دی گئیں۔ڈی جی پی ڈی ایم اے عرفان علی کاٹھیا نے کہا ہے کہ ہنگامی صورتحال سے نمٹنے کے لیے متعلقہ محکمے الرٹ رہیں، صوبائی کنٹرول روم سمیت تمام اضلاع کے ڈسٹرکٹ ایمرجنسی آپریشن سنٹرز کو بھی الرٹ کر دیا گیا ہے اور کنٹرول روم میں صورتحال کی مانیٹرنگ مسلسل جاری ہے۔
ڈی جی عرفان علی کاٹھیا نے کہا کہ 1122 اور واسا سمیت دیگر ریسکیو ادارے مشینری سمیت عملے کو الرٹ رکھیں اور نشیبی علاقوں سے پانی کی نکاسی کو جلد از جلد ممکن بنائیں ۔ انہوں نے کہا کہ مون سون بارشوں کا یہ سلسلہ 13جولائی تک جاری رہنے کی پیشنگوئی کی گئی ہے ،شہری احتیاط کریں، بجلی کے کھمبوں ، لٹکتی تاروں ،کچے مکانات اور بوسیدہ عمارتوں سے دور رہیں۔
انہوں نے کہا کہ شہری بچوں کا خاص خیال رکھیں اور انہیں نشیبی علاقوں میں جمع پانی کے قریب ہرگز نہ جانے دیں، کسی بھی ایمرجنسی کی صورت میں شہری پی ڈی ایم اے کی ہیلپ لائن 1129 پر کال کر سکتے ہیں۔
