لاہور۔2جنوری (اے پی پی):آئی جی پنجاب ڈاکٹر عثمان انور کا پولیس افسران کی اعلیٰ تعلیم کےلئے احسن اقدام، پنجاب پولیس اور نجی یونیورسٹی کے درمیان باہمی تعاون بڑھانے کا معاہدہ طے پا گیا جس کے تحت یونیورسٹی نے پولیس افسران کی اعلیٰ تعلیم کےلئے5 کروڑ روپے سالانہ سکالرشپ فنڈ قائم کردیا۔
منگل کو جاری بیان میں ڈاکٹر عثمان انور نے کہا کہ ہر رینک کے پولیس افسر کو ماسٹرز، ایم فل اور پی ایچ ڈی کی ڈگریوں کےلئے وظائف دیے جائیں گے، افسران تعلیمی اخراجات کا 10 فیصد خود جبکہ90 فیصد یونیورسٹی برداشت کرے گی۔انہوں نے کہا کہ پولیس افسران نجی یونیورسٹی میں ماڈرن پولیسنگ سمیت دیگر اہم مضامین میں اعلیٰ تعلیم حاصل کرسکیں گے جس سے ان کی استعداد کار میں اضافہ اور سروس ڈیلیوری میں بہتری آئے گی۔ان کا کہنا تھاکہ پولیس فورس کے بچوں کےلئے فارن سکالرشپس کا آغاز بھی کردیا گیا ہے۔
