لاہور۔2مئی (اے پی پی):پاکستان سپر لیگ (پی ایس ایل) کی مقبول ترین کرکٹ فرنچائز لاہور قلندرز کے فیس بک اور انسٹاگرام پیجز بھارت میں ناظرین کیلئے بند کر دیئے گئے ہیں۔فرنچائز کے ترجمان کے مطابق بھارت میں صارفین کو لاہور قلندرز کے سوشل میڈیا پیجز تک رسائی حاصل نہیں رہی۔
ترجمان نے بتایا کہ بھارت میں ناظرین کو ایک پیغام موصول ہو رہا ہے جس میں کہا گیا ہے کہ آپ کے پیجز بھارت میں دستیاب نہیں۔سوشل میڈیا پلیٹ فارمز کی جانب سے اس پابندی کی کوئی واضح وجہ تاحال سامنے نہیں آئی۔
انسٹاگرام کی طرف سے فراہم کردہ ابتدائی معلومات کے مطابق یہ پابندی بھارت میں اطلاعات و ٹیکنالوجی سے متعلق مقامی قانون کے تحت عائد کی گئی ہے۔واضح رہے کہ لاہور قلندرز کے سوشل میڈیا چینلز دنیا بھر میں سب سے زیادہ فالو کئے جانے والے کرکٹ فرنچائزز میں شامل ہیں جن کی مجموعی ویور شپ264 ملین سے زائد ہے۔
Short Link: https://urdu.app.com.pk/urdu/?p=591328
