اسلام آباد۔5اپریل (اے پی پی):پاک بحریہ کے جہاز (پی این ایس) اصلت نے کمبائنڈ ٹاسک فورس 151(سی ٹی ایس۔151)کی معاونت میں صومالیہ کے مشرقی ساحل سے دور بحیرہ عرب میں انسداد قزاقی گشت کا آغاز کیا ہے، سی ٹی ایس۔151 کی قیادت اس وقت پاکستان نیوی کر رہی ہے۔
ڈائریکٹوریٹ جنرل پبلک ریلیشنز (پاک بحریہ) کی طرف سے ہفتہ کو یہاں جاری ہونے والی ایک پریس ریلیز میں کہا گیا ہےکہ پاکستان نیوی کی زیر قیادت سی ٹی ایس۔151 خلیج عدن، سوکوترا گیپ کے آس پاس اور صومالیہ کے مشرقی ساحل میں بحری قزاقی کے خطرے سے چوکس رہتے ہوئے خطے میں اپنی موجودگی کو بڑھانے کے لیے فعال اقدامات کر رہی ہے۔
ان کوششوں کا مقصد بحری قزاقی، مسلح ڈکیتی اور دیگر غیر قانونی سرگرمیوں کو روکنا ہے تاکہ اہم سی لائنز آف کمیونیکیشن (SLOCs) کی حفاظت کو یقینی بنایا جا سکے۔پی این ایس اصلت کی تعیناتی بحری قزاقی اور مسلح ڈکیتی سے نمٹنے کے لیے پاک بحریہ کے پختہ عزم کی عکاسی کرتی ہے، اس کے ساتھ ساتھ عالمی میری ٹائم کامنز کی حفاظت اور خطے میں میری ٹائم تجارت کے آزادانہ بہاؤ کو یقینی بناتی ہے۔
Short Link: https://urdu.app.com.pk/urdu/?p=578716
