اسلام آباد۔27اگست (اے پی پی):وفاقی وزیر برائے قومی ورثہ و ثقافت اورنگزیب خان کھچی نے کہا ہے کہ پاکستان نیشنل کونسل آف دی آرٹس (پی این سی اے )نوجوان فنکاروں کو اپنی صلاحیتیں دکھانے کے لئے ایک اہم قومی پلیٹ فارم فراہم کر رہا ہے، ملک کے ثقافتی ورثے کے فروغ اور نئی نسل کے فنکاروں کی حوصلہ افزائی وقت کی اہم ضرورت ہے۔ ان خیالات کا اظہار انہوں نے بدھ کو پی این سی اے میں نوجوان گریجویٹس کی تیسری نمائش "شیئرڈ ڈسٹنسز” کے افتتاح کے موقع پر کیا۔ اس موقع پر مراکش کے سفیر بھی موجود تھے۔ یہ نمائش کیوریٹر نور فاطمہ کی نگرانی میں ترتیب دی گئی ہے جس میں 40 سے زائد ابھرتے ہوئے فنکاروں کے فن پارے شامل ہیں۔ ان فنکاروں کا تعلق نیشنل کالج آف آرٹس، فاطمہ جناح ویمن یونیورسٹی، راولپنڈی ویمن یونیورسٹی اور کامسیٹس یونیورسٹی سمیت جڑواں شہروں کے نمایاں اداروں سے ہے۔نمائش میں مصوری، پرنٹ میکنگ، مجسمہ سازی، منی ایچر اور انسٹالیشن آرٹ کے ذریعے موجودگی اور غیر موجودگی، قربت اور فاصلے، ماضی اور مستقبل جیسے موضوعات کو اجاگر کیا گیا ہے۔
نوجوان فنکاروں نے اپنی تخلیقات میں یادداشت، خواہش، صبر اور تبدیلی کے جذباتی مناظر پیش کئے ہیں۔تقریب سے خطاب کرتے ہوئے وفاقی وزیر برائے قومی ورثہ و ثقافت اورنگزیب خان کھچی نے کہا کہ پی این سی اے نوجوان فنکاروں کو اپنی صلاحیتیں دکھانے کے لئے ایک اہم قومی پلیٹ فارم فراہم کر رہا ہے، ملک کے ثقافتی ورثے کے فروغ اور نئی نسل کے فنکاروں کی حوصلہ افزائی وقت کی اہم ضرورت ہے۔نمائش میں شامل فنکاروں میں امنہ وجاہت، اریبہ نعیم، فاطمہ خان، حزافہ عاصم، مشعل محسود، ندا زینب، صالحہ نسیم، سمرین رحمان، طیبہ قریشی، زکیہ عرفان خان اور زینب اکرم سمیت دیگر شامل ہیں۔یہ نمائش 27 اگست سے شروع ہو کر 10 ستمبر 2025 تک پی این سی اے کی گیلری نمبر 5 اور 6 میں جاری رہے گی۔ شائقین صبح 10 بجے سے دوپہر 4 بجے تک (ہفتہ کے علاوہ) نمائش دیکھ سکتے ہیں۔
