لاہور۔26اگست (اے پی پی):پی ڈی ایم اے پنجاب نے دریائے راوی میں انتہائی اونچے درجے کے سیلاب کا الرٹ جاری کر دیا، آئندہ 48 گھنٹوں میں جسڑ شاہدرہ اور ہیڈ بلوکی سے انتہائی اونچے درجے کا سیلابی ریلہ گزرے گا۔ ترجمان کے مطا بق دریائے راوی میں پانی کی سطح میں مسلسل اضافہ ہورہا ہے،دریائے راوی میں جسڑ کے مقام پر اونچے درجے کا جبکہ شاہدرہ کے مقام پر نچلے درجے کا سیلاب ہے،جسڑ کے مقام پر 1 لاکھ 11 ہزار کیوسک پانی مسلسل دریائے راوی میں داخل ہو رہا ہے
۔ترجمان کے مطا بق متوقع سیلابی ریلے کے حوالے سے کمشنر لاہور، گوجرانوالہ، ملتان، ساہیوال، فیصل آباد اور متعلقہ اضلاع کے ڈپٹی کمشنرز کو الرٹ جاری کر دیا گیا ہے اور دریائے راوی سے ملحقہ اضلاع کی انتظامیہ کو ہنگامی اقدامات کرنے کی ہدایات بھی کر دی گئی ہیں ۔ ڈی جی پی ڈی ایم اے عرفان علی کاٹھیا نے کہا ہے کہ د ریائے راوی کے پاٹ میں موجود شہریوں کے فوری انخلا ء کو عمل میں لا یا جا ئے،مساجد کے ذریعے اعلانات کے ذریعے شہریوں کو ممکنہ صورتحال بارے آگاہ کیا جائے ،شہریوں کے جان و مال کے تحفظ کے لئے کسی قسم کی کوتاہی نہ کی جائے۔ ڈی جی پی ڈی ایم اے نے کہا کہ ہنگا می صورتحال میں شہری انتظامیہ سے تعاون کریں،احتیاطی تدابیر سے نقصان سے بچا جا سکتا ہے، شہری پی ڈی ایم اے کی ہیلپ لائن سے بھی راہنمائی لے سکتے ہیں۔
