چیئرمین اسلامی نظریاتی کونسل نے صدقہ فطر اور فدیہ صوم کا نصاب جاری کردیا

لاہور۔9فروری (اے پی پی):چیئرمین اسلامی نظریاتی کونسل علامہ ڈاکٹر راغب حسین نعیمی نے رواں سال کیلئے صدقہ فطر اور فدیہ صوم کا نصاب جاری کر دیا ہے۔چیئرمین اسلامی نظریاتی کونسل کے مطابق رواں سال صدقہ فطر وفدیہ صوم کم ازکم 300 روپے فی کس ادا کیا جائے۔گندم کا آٹا 300،جو کے حساب سے1100 روپے صدقہ فطر اور فدیہ صوم ادا کیاجائے۔

کھجور کے حساب 1600 روپے،کشمش کے حساب 3800 روپے،منقی کے حساب سے 5400روپے، جبکہ سرکاری آٹا کے حساب سے 200روپے صدقہ وفدیہ صوم ادا کیا جائے۔ چیئرمین اسلامی نظریاتی کونسل نے کہا کہ صدقہ فطر ہر غلام، آزاد، مرد، عورت، چھوٹے اور بڑے مسلمان پر فرض ہے۔

صاحب استطاعت افراد کو گندم پر انحصار کرنے کے بجائے اپنی مالی حیثیت کے مطابق صدقہ فطر ادا کرنا چاہیے تاکہ زیادہ سے زیادہ مستحقین کی مدد ہو سکے۔

انہوں نے یہ بھی بتایا کہ جان بوجھ کر روزہ توڑنے کا کفارہ مسلسل60 روزے رکھنا یا60 مساکین کو دو وقت کا کھانا کھلانا ہے۔ گندم کا نصاب وزن کے لحاظ سے نصف صاع (2کلو احتیاطا) جو، کجھور، منقی کا نصاب ایک صاع (4کلوگرام احتیاطا) بنتا ہے۔