اسلام آباد ۔ 8 فروری (اے پی پی) چیئرمین سینیٹ محمد صادق سنجرانی سے کرغستان اور قازقستان کے سفراء نے جمعہ کو یہاں ملاقات کی اورباہمی دلچسپی کے امور پر گفتگو اور دوطرفہ تعاون کو فروغ دینے پر اتفاق کیا، دونوں سفیروں نے چیئرمین سینیٹ سے پارلیمنٹ ہاو¿س میں الگ الگ ملاقاتیں کیں۔ چیئرمین سینیٹ صادق سنجرانی نے کرغستان کے سفیر سے بات چیت کے دوران کہا کہ دونوں ملکوں کے مابین پارلیمانی تعاون کو مزید فروغ دینے کی ضرورت ہے، پاکستان اور کرغستان کی پارلیمنٹ میں دوستی گروپوں کو مزید فعال بنایا جاسکتاہے۔ پاکستان اور کرغستان نے بین الاقوامی فورمز کی سطح پر اہم بین الاقوامی امور کے حوالے سے یکساں موقف اختیار کیا ہے۔ انہوں نے کہاکہ دونوں ملکوں کا ایشیائی پارلیمانی اسمبلی کی سطح پر تعاون قابل ستائش ہے، دونوں ملکوں کے مابین تجارتی تعاون اور سرمایہ کاری میں اضافے کی ضرورت ہے، تعلیم کے شعبے میں موجود مثالی تعاون کو مزید تقویت دی جا سکتی ہے۔ صادق سنجرانی نے قازقستان سے سفیر سے بات چیت کے دوران کہا کہ پاکستان اور قازقستان کے مابین برادرانہ اور دوستانہ تعلقات ہماری خارجہ پالیسی کا اہم جزو ہیں۔ سینیٹ میں قازقستان، پاکستان دوستی گروپ موجود ہے جس کے ذریعے دونوں ملکوں کے مابین پارلیمانی تعلقات کو مزید مربوط بنایا جاسکتا ہے۔چیئرمین سینیٹ نے کہاکہ پاکستان اور قازقستان کے مابین ایشیائی پارلیمانی اسمبلی کی سطح پر بھی بہترین تعلقات ہیں اور دونوں ممالک نے اکثر بین الاقوامی اور علاقائی امور پر یکساں موقف اختیار کیا ہے، پاکستان اور قازقستان کے مابین دفاع اور دیگر شعبوں میں وسیع تعاون موجود ہے۔ قازقستان کے صدر کے گزشتہ سال کے پاکستان کے دورے سے دوطرفہ تعاون میں مزید اضافہ ہوا ہے۔ انہوں نے کہا کہ پارلیمانی تعلقات کے فروغ سے معاشی اور اقتصادی شعبوں میں تعاون میں استحکام آئے گا۔
