چیئرمین سینیٹ کا صوبہ بلوچستان کے علاقے لسبیلہ میں زائرین کی بس کو پیش آنے والے حادثہ میں ہونے والے جانی نقصان پر دکھ اور افسوس کا اظہار

اسلام آباد۔25اگست (اے پی پی):چیئرمین سینیٹ سید یوسف رضا گیلانی نے صوبہ بلوچستان کے علاقے لسبیلہ میں زائرین کی بس کو پیش آنے والے حادثہ میں ہونے والے جانی نقصان پر دکھ اور افسوس کا اظہارکیا ہے۔یہاں جاری بیان کے مطابق چیئرمین سینیٹ سید یوسف رضا گیلانی نے حادثے میں جاں بحق ہونے والوں کے لواحقین سے اظہار تعزیت کی۔

زائرین کی بس کو پیش آنے والے حادثے کا سن کر بہت دکھ ہوا۔بس حادثہ میں متعدد افراد ہلاک اور زخمی ہو گئے تھے،اس مشکل گھڑی میں غمزدہ خاندانوں کے دکھ میں برابر کا شریک ہوں۔چیئرمین سینیٹ نے حادثے میں جاں بحق ہونے والوں کی مغفرت، لواحقین کے لئے صبرجمیل اور زخمیوں کو جلد صحتیابی کی دعا کی۔ڈپٹی چیئرمین سینیٹ سیدال خان نے زائرین کی بس کے حادثے پر دکھ اور افسوس کا اظہار کیا۔