اسلام آباد ۔ 7 مئی (اے پی پی) قومی احتساب بیورو (نیب) کے چیئرمین جسٹس جاوید اقبال نے حکومت سندھ کے محکمہ خوراک کی طرف سے دو مقدمات جن میں سندھ میں گندم کے سٹاک کی فزیکل ویریفیکیشن (مو قع پر سٹاک کی جانچ پڑتال) اور ڈسٹرکٹ گھوٹکی سے کراچی ریجن تک گندم کی ترسیل میں خوردبرد/چوری شامل ہیں، کی تحقیقات کا حکم دیا ہے اور ڈی جی نیب سکھر کو ہدایت کی ہے کہ دونوں مقدمات کی فوری تحقیقات شروع کی جائیںاور بدعنوان عناصر سے سرکاری فنڈز برآمد کر کے قومی خزانے میں جمع کرائے جائیں۔ واضح رہے کہ دونوں مقدمات پہلے اینٹی کرپشن اسٹیبلشمنٹ سندھ کو ریفر کئے گئے تھے۔ یہ امر قابل ذکر ہے کہ نیب سکھر پہلے ہی سندھ میں گندم کے سٹاک، خوردبرد/چوری کی تحقیقات کے نتیجہ میں 15 ارب روپے کی گندم کے سٹاک، خوردبرد/چوری کو پکڑنے کے ساتھ ساتھ 10 ارب روپے بدعنوان عناصر سے برآمد کرکے بلاواسطہ اور بالواسطہ طور پر حکومت سندھ کے خزانہ میں جمع کرا چکا ہے جو کہ نیب خصوصاً نیب سکھر کی بڑی کامیابی ہے۔
