ملتان ۔ 29 اگست (اے پی پی):چیئرمین این ایچ اے شہریار سلطان نے کمشنر ملتان ڈویژن عامر کریم خاں کے ہمراہ ہیڈ محمد والا بریچنگ سیکشن کا دورہ کیا اور وہاں جاری انتظامات کا تفصیلی جائزہ لیا۔ کمشنر عامر کریم خان نے چیئرمین این ایچ اے کو دریائے چناب کی صورتحال اور ممکنہ خطرات سے نمٹنے کے لیے کیے گئے اقدامات پر بریفنگ دی۔ انہوں نے بتایا کہ آئندہ دو روز میں آٹھ لاکھ کیوسک کا سیلابی ریلا متوقع ہے جس کے پیش نظر تمام تر انتظامات مکمل کر لیے گئے ہیں تاکہ کسی بھی ہنگامی صورتحال میں بروقت کارروائی ممکن ہو سکے۔
کمشنر نے بتایا کہ انتظامی رابطے کو مؤثر بنانے کے لیے ہر ضلع میں اے ڈی سی ریونیو اور ڈویژن کی سطح پر ایڈیشنل کمشنرز کو فوکل پرسن مقرر کیا گیا ہے۔ چیئرمین این ایچ اے شہریار سلطان نے موقع پر انتظامات کا معائنہ کرتے ہوئے انتظامیہ کی تیاریوں کو سراہا اور کہا کہ تمام ادارے اپنی ذمہ داریاں بھرپور طریقے سے ادا کر رہے ہیں۔اس موقع پر ڈپٹی کمشنر وسیم حامد سندھو اور محکمہ ایریگیشن سمیت متعلقہ محکموں کے افسران بھی موجود تھے۔
