اسلام آباد ۔ 6 جولائی (اے پی پی) سپریم جوڈیشل کمیشن نے پشاور ہائیکورٹ کے تین ایڈیشنل ججز کے عہدوں کی معیاد میں ایک سال کی توسیع کرنے کی سفارش کر دی ہے۔ تفصیلات کے مطابق پیر کو چیف جسٹس گلزار احمد کی زیر صدارت سپریم جوڈیشل کمیشن کا اجلاس اسلام آباد میں ہوا۔ اجلاس میں پشاور ہائیکورٹ میں چار ایڈیشنل ججز کی تعیناتی کیلئے غور کیا گیا۔ اجلاس کے دوران پشاور ہائی کورٹ کے چیف جسٹس وقار احمد سیٹھ نے پشاور ہائیکورٹ میں ایڈیشنل ججز کی تعیناتی کیلئے بھجوائے گئے نام واپس لے لیے۔ اجلاس میں پشاور ہائیکورٹ کے چار ایڈیشنل ججز کو مستقل کرنے پر بھی غور کیا گیا۔ اجلاس کے دوران سپریم جوڈیشل کمیشن کی جانب سے پشاور ہائیکورٹ کے تین ججز کی مدت ملازمت میں ایک سال کی توسیع بارے سفارش کی گئی۔ سپریم جوڈیشل کمیشن کی جانب سے جسٹس صاحبزادہ اسد اللہ، جسٹس نعیم انور اور ایڈیشنل جج جسٹس وقار احمد کی مدت ملازمت میں ایک سال کی توسیع کی سفارش کی گئی ہے جبکہ ایڈیشنل جج احمد علی کی مدت ملازمت میں ایک سال کی توسیع کی کوئی سفارش نہیں کی گئی۔ سپریم جوڈیشل کمیشن کی سفارشات پارلیمانی ججز تقرری کمیٹی کو بھجوا دی گئی ہیں۔
