اسلام آباد۔28اگست (اے پی پی):چیف ٹریفک آفیسر کیپٹن (ر)حمزہ ہمایوں کی زیرصدارت ٹریفک ہیڈ کوارٹر میں اجلاس منعقد ہوا جس میں ایس پی ٹریفک ماجد اقبال اور زونل ڈی ایس پیز نے شرکت کی۔اجلاس میں وفاقی دارالحکومت میں ٹریفک کی روانی کو یقینی بنانے کے لئے کئے گئے انتظامات کا جائزہ لیا گیا۔چیف ٹریفک آفیسر (سی ٹی او)نے کہا کہ زونل افسران اپنے اپنے ایریاز میں رش والے پوائنٹس کی نشاندہی کریں،رش کے اوقات میں ٹریفک کو منظم انداز میں کنٹرول کیا جائے،روزانہ کی بنیاد پر زونل افسران اپنی کارکردگی رپورٹ پیش کریں گے،ٹریفک قوانین کے متعلق آگاہی مہم جاری رکھی جائے گی۔
سی ٹی او نے کہا کہ وفاقی دارالحکومت کے تجارتی مراکز میں روزانہ کی بنیاد پر غیر قانونی پارکنگ پر آپریشن کیے جائیں، ہم نے ٹریفک پولیس کو کرپشن فری ادارہ بنانا ہے، کرپشن میں ملوث اہلکاروں کی محکمہ میں کوئی جگہ نہیں۔سی ٹی او نے کہا کہ ٹریفک ایجوکیشن ونگ کی کارکردگی کو مزید بہتر بنایا جائے۔ چیف ٹریفک آفیسر کیپٹن (ر)حمزہ ہمایوں نے کہا کہ شہریوں کو زیادہ سے زیادہ سہولیات فراہم کی جائیں، ٹریفک قوانین کی خلاف ورزی پر سخت قانونی کارروائی عمل میں لائی جائے۔
