بیجنگ۔18جون (اے پی پی):چینی وزارت خارجہ کے ترجمان گو جی آکون نے کہا ہے کہ بدھ کے روز تک چین کی وزارت خارجہ، ایران میں چینی سفارتخانے اور قونصل خانوں کی ہم آہنگی اور متعلقہ ہمسایہ ممالک کی فعال معاونت و حمایت سے 791 چینی شہریوں کو ایران سے محفوظ علاقوں میں منتقل کر دیا گیا ہے جبکہ مزید 1,000 سے زائد افراد کا انخلا جاری ہے۔
ایران اور اسرائیل میں چینی شہریوں کے محفوظ انخلاء سے متعلق حکومتی اقدامات پر ایک سوال کے جواب میں گو جی آکون نے کہا کہ آذربائیجان اور ترکمانستان جیسے ہمسایہ ممالک میں چینی سفارتخانوں اور قونصل خانوں نے بارڈر چیک پوائنٹس پر چینی شہریوں کی مدد کے لیے ٹیمیں روانہ کی ہیں، جو ان کی سرحد پار کرنے، عارضی قیام اور چین واپسی میں معاونت فراہم کر رہی ہیں۔
کچھ چینی شہریوں کو اسرائیل سے بھی محفوظ طریقے سے منتقل کر لیا گیا ہے۔انہوں نے کہا کہ ہم متعلقہ ممالک کی بھرپور حمایت اور مدد پر ان کے شکر گزار ہیں۔ انہوں نے مزید کہا کہ ہماری وزارت، اور متعلقہ سفارتخانے و قونصل خانے چینی شہریوں کے انخلا میں بھرپور کوششیں جاری رکھیں گے۔
