بیجنگ۔6دسمبر (اے پی پی):چین کے وزیر خارجہ وانگ ای نے امریکی وزیر خارجہ انتھونی بلنکن کے ساتھ ٹیلی فون پر رابطہ کیا ۔چینی میڈیا کی رپورٹس کے مطابق ٹیلیفونک گفتگو کے دوران وانگ ای نے کہا کہ حال ہی میں صدر شی جن پنگ اور صدر جو بائیڈن کے درمیان سان فرانسسکو میں ہونے والی ملاقات مستقبل کے لیے ’’سان فرانسسکو وژن‘‘ کی صورت میں ایک سنگ میل ہے،
اس وقت دونوں فریقین کا اہم کام سان فرانسسکو سمٹ کے مثبت اثرات کو جاری رکھنا، دونوں سربراہان مملکت کے درمیان طے پانے والے اتفاق رائے پر عمل درآمد کرنا، چین امریکہ تعلقات کو مستحکم کرنا اور صحت مند، مستحکم اور پائیدار سمت میں چین امریکہ تعلقات کی بہتری اور ترقی کو فروغ دینا ہے۔ یہ چین اور امریکہ کا مشترکہ مفاد ہے اور یہ دونوں بڑے ممالک کی ذمہ داری بھی ہے۔
دونوں رہنمائوں نے فلسطین اسرائیل تنازع پر بھی تبادلہ خیال کیا اور مشرق وسطیٰ کی صورتحال پر رابطے برقرار رکھنے پر اتفاق کیا۔ وانگ ای نے کہا کہ غزہ کے موجودہ بحران کا کوئی بھی حل دو ریاستی حل سے الگ نہیں کیا جا سکتا ۔
چین کا ماننا ہے کہ اس مسئلے کے حل کا بنیادی مقصد فلسطین کے حق خود ارادیت کا احترام کرنا اور ’’فلسطینیوں کی ملکیت، فلسطینیوں کی زیر قیادت اور فلسطین کی حکمرانی فلسطینیوں کے ہاتھ میں‘‘ کے اصول کو اپنانا ہے، چین اس مقصد کے لئے تمام فریقوں کے ساتھ مل کر کام کرنے کے لئے تیار ہے۔اس موقع پر امریکی وزیر خارجہ انتھونی بلنکن نے سابق امریکی وزیر خارجہ ہنری کسنجر کے انتقال پر اظہار تعزیت کے لیے چین میں امریکی سفارت خانے کا دورہ کرنے پر وانگ ای کا شکریہ ادا کیا۔
Short Link: https://urdu.app.com.pk/urdu/?p=417525
